Shiga

Covid-19 machyi masha masat 14 hte nbungli, mawdaw rau jawn ai Myitkyina na masha langai hpe laksan tawn da

Covid-19 ana machyi masha masat – 14 hte Thachileik kaw nna Mandalay du hkra nbungli hte mawdaw langai hta sha rau jawn ai masha Myitkyina de du nga sai majaw, shi hpe laksan shara e tawn da sai rai nna, ana kap nkap san jep na matu mung hkyen nga ai lam chye lu ai.

Myen asuya hkamja dap a March 30 ya shana ndau ai machyi masha masat 14 gaw asak 24 ning rai nna lai wa sai bat hta sha Thai mung kaw nna wa ai re. Shi hta Covid -19 ana mu ai majaw ya yang Chyauk Me tsi rung e tawn da ai lam tsun da ai re.

Dai machyi masha hte rau Mandalay nbungli pa kaw Pyi Oo Lwin du hkra mawdaw langai hta sha rau jawn wa ai wa gaw March 29 ya shana de Mandalay kaw nna Myitkyina de wan leng hte jawn wa ai rai nna, March 30 ya shani Myitkyina Rambu lawk de du wa ai re.

Dai re majaw shi hpe dai ni March 31 kaw nna Myitkyina Hkamja Dap e hkyak hkyak Facility Quarantine hku nna tawn da ai lam mungdaw shinggyim wuhpung wuhpawng hte seng ai hkringmang salang Nay Win a facebook hta mara tawn ai re.

Myitkyina e Covid-19 ntsen masha nkau du wa ai raitim, ana san jep ngut ai hpang ‘negative’ ana nkap ai mahtai pru ai hpe chye lu ai.

March 30 ya shana du hkra Myen mung ting madang ana mu jep ai masha marai 14 du sai rai nna, machyi masha masat -5 gaw March 31 ya jahpawt nnga mat sai re.

 

Related Articles

Leave a Reply

Your email address will not be published. Required fields are marked *

Back to top button