Manmaw hpyen man shara ni de Myen hpyen maga dai hpawt jau kawn, laja lana bai htu shadut htim gasat nga ai lam shawng lam hpyen magam gun hte ni nawn ai ni tsun ai re.
Lai wa sai bat 2 daram kaw na Myen hpyen ni Deng 2 maga htu shadut nga ai ten, KIA Pawng hpawm maga, Ts.K.Hk (21) shingdu na Moe Tseing Kyun Mali Hka Zinlawng hpe htim gasat taw ai rai nga ai.
Dai zawn htim gasat ai kaw na, Myen hpyen ni Counter-attack bai galaw wa ai lam re nga, shawng lam hpyen magam gun hte ni nawn ai salang wa n dai zawn tsun dan ai re.
Manmaw hpe Myen hpyen ni dai hpawt kaw na laja lana bai n htang gasat taw sai, Myen hpyen maga Counter-attack bai galaw wa ai ga rai nga ai,” nga tsun ai re.
Myen hpyen maga htu shadut htim gasat wa ai majaw, KIA hte pawng hpawm maga ninghkap majan hku shingla gasat taw ai rai nga ai.
Ya Myen hpyen maga madung htu shadut htim gasat taw nga ai gaw, Manmaw Deng 2/3 maga, Manmaw Computer Dakkasa, Han Te ,maga shara ni de re lam chye lu ai.
KIA hte Pawng hpawm maga na mung Myen hpyen dap htim gasat wa ai hpe lu ai atsam htum hkra hte hkap shingla gasat nga ai majaw, Mung shawa yawng mung myit dum akyu hpyi ya nga na matu shawng lam hpyen magam gun tsun hpyi shawn da ai re.
Manmaw gaw, lamu ga nra ai hta sha n ga, hka Nawng law ai ginra langai re majaw, Manmaw hpe htim gasat ai lam hta mayak lam ni grai law ai re hpe ginra masha langai tsun maram tawn ai re.
Manmaw hpe gaw moi kaw na mung kring mading dap jung tawn ai dap shara re lam matut chye lu nga ai.
Manmaw gaw sut Hpaga lam ni hta ahkyak ai zawn Myen hpyen dap hte KIA lahkawng maga na matu ahkyak ai lamu ga shara langai mung rai nga ai.
