Hpakant Yuma Everwin Myaw Chan hpe KIA PDF dap ni Drone hte bawm sa jahkrat bun ai hpang kaw na, dai na de du lahkawng maga gap gasat hkat taw ai lam ginra masha ni tsun dan ai kaw na chye lu ai.
Dai ni October 20 ya shana maga hkying 2 aten daram kaw na, Hpakant Yuma Everwin Myaw Chan wang hta rawng nga ai Myen Hpyen hpung ni hpe KIA maga shawng Drone bawm sa jahkrat bun ya ai hpang kaw na, lahkawng maga laknak kaba ni gap sharu bun hkat taw ai lam ginra masha langai KNG Shiga de tsun dan wa ai re.
“Dai ni gaw anhte maga na ni Yuma mare Everwin Myaw Chan kaw rawng ai Myen ni hpe Drone bawm shawng sa jahkrat bun ai da, dai kaw Myen ni hkra machyi ai lam nga ai majaw, laknak kaba hte shani ting gap hkat ma ai,” nga tsun dan wa ai re.
Myen Hpyen hpung ni gaw, Lai wa sai Shata hta, shan the tat sum kau da ai shar ani hpe bai gasat zing na matu, Hpyen n gun kaba hte htu shadut yu ai rai tim, Masan n sa ai majaw, Hpakant de htu da ai hpyen n gun n kau hpe lai wa sai bat kaw na bai shaw la kau sai lam matut chye lu ai.
Hpakant Seng Tawng maga de htu taw ai Myen Hpyen hpung ni hpe bai hting nut shaw la kau ai hpang kaw na grai wa gap gasat hkat ai lam n nga mat sai rai tim, dai ni kaw na Yuma maga de bai ngoi wa ai lam rai nga ai.
Myen Hpyen hpung ni htu shadut wa ai majaw, gan hprawng yen ai, Malang Dung mare masha ni mung tinang mare buga de bai wa n htang nga taw sai lam chye lu ai.
