Gwihtu Pyithutsit Ningbaw Salang Naw Li wa, Salang Gam Awng hpe gap sat kau da nna, hprawng mat ai hpe, Myen Hpyen Balik ni Mandalay nbungli pa hta bai hkap rim woi da sai lam, Myen Hpyen dap hte ni nawn ai shiga ni kaw na chye lu ai.
Salang Naw Li wa gaw, Bankok kaw na Mandalay de bai shang wa ai ten, masha sat amu mang hkang, လဝက Amu mang hkang ni hte tara jewat da ai majaw, Mandalay Nbungli pa kaw na, August 28 ya shani hta hkap rim da ai lam chye lu ai.
Miwa Naw Li wa gaw, mung chying masat 2 lang ai rai nna, Gam Awng hte amu mang hkang byin ai hpang, shi hta mung hkala hkrum ai majaw, Bankok de tsi sa tsi nna, bai n htang wa ai ten, လ.ဝ.က အမှု hte hkap rim woi hkrum ai rai nga ai.
“Miwa Naw Li wa gaw, Gam Awng hpe gap sat da nna, Myitkyina M.P.Hk de sa hprawng nga mat ai, Bankok de tsi tsi sa na nga nna, Taimu na madi shadaw laika hte Nbungli jawn na hprawng yen mat ai rai nga ai, ndai kaw nga taw ai Nyut Tseing wa mung Min Aung Hlaing wa hpang de du hkra shawk shawn da ai, dai majaw mung hkap rim woi ai she n rai i,” nga Gwihtu Pyithutsit the ni nawn ai Salang langai KNG shiga dap de tsun dan wa ai re.
Gwihtu Pyithutsit Ningbaw Lasang Awng Wa Si mat ai hpang, Ningbaw shara kashun hkat na, Salang Gam Awng hte Slg Naw Li wa, lai wa sai July praw 8 ya shana hta, Nawng Hkying Pyithutsit rung kaw gap sat hkat wa ai rai nga ai.
Miwa Naw Li wa, Salang Gam Awng hpe gap sat kau da nna, Myen Hpyen dap daju M.P.Hk de sa makoi rawng mat ai hpang, Tai Mu a madi shadaw laika hte, Nbungli jawn na hprawng mat ai gaw, lai wa sai bat hta, Mandalay kaw bai hkap rim hkrum ai lam mung rai nga ai.
Ndai amu mabyin lam hte seng nna, Gwihtu Pyithutsit a Sut Nhprang dap na Salang Nyut Tseing wa gaw, Myen Hpyen Dap ningbaw Min Aung Hlaing de laika hte tara shang a tsawm hkrak shawk shawn da ai rai nga ai.
Salang Nyut Tseing shawk shawn da ai hpang, Myen Hpyen dap maga na sha ya na zawn rim ahkyak la wa ai mung rai nga ai.
Gwihtu ginra Pyithutsit ningbaw Lasang Awng si mat ai hpang, Ningbaw shara hpe Miwa Naw Li wa shang shara la nna, Myen Gam Awng wa gaw, Ningtau Ningbaw galaw wa ai ten, ya na zawn shada gyam sat hkat wa ai lam mung rai nga ai.
