Lawa mare dap jung shara la nga ai Myen hpyen dap hte Pyithutsit dap ni hpe Wunpawng Mungdan Shanglawt Hpyen dap KIA kaw na dai hpawt manap htim gasat shachyut kau lu sai nga, Lawa ginra masha langai KNG shiga dap de tsun dan wa ai re.
Dai hpawt manap hkying 7 ten daram hta Lawa Hpaji jawng hta dap jung shara la nga ai Myen hpyen dap hte Pyithutsit ni hpe KIA pawng hpawm dap ni sa gap gasat ai majaw, Myen hpyen dap ni yawng hprawng mat sai nga tsun ai re.
“Lawa mare hpaji jawng hta bat mi jan wa du dap jung shara la nga ai Myen hpyen hpung hte Pyithutsit hpung ni hpe dai hpawt manap hkying 7 ram hta Dapba 2, Dung 20 hte PDF pawng hpawm dap ni sa htim gap gasat ai majaw, Myen ni yawng hprawng yen mat sai, gara de hprawng mat ai kun gaw a tsawm n chye lu ai. Ya Lawa mare makau grup yin yawng gaw shanglawt ni bai zing da sai re ga rai nga ai,” nga tsun dan wa ai re.
Dai hpawt manap Lawa mare kaw dap jung nga ai Myen hpyen dap htePyithutsit ni hpe sa htim gap gasat ai hta num daw lahkawng lang sa gap gasat ai hpang, Shani ka-ang hkying 11 ten daram hta yawng gasat jahprawng kau lu ai re.
Dai Myen hpyen hpung hte Pyithutsit ni gaw, Kamaing maga de hprawng yen mat wa ai lam chye lu ai.
Dai hpawt manap gap gasat hkat wa ai hta, Sinat ngoi wa ai majaw, gat dut nga ai kaw na kagat wa ai, hpawmi langai hkala hkrum wa ai re.
Dai hkala hkrum wa ai amyu shayi hpe Namti de htaw shalai la na matu Mawdaw mayak lam ni hkrum wa ai lam chye lu ai.
“Dai hpawt hkying 7 ram gaw gap hkat wa na, Gat kaw na hprawng wa ai kaw sinat pala hkra ai majaw hkala hkrum ai, ya mung Lawa kaw na n lu shalai la shi taw nga ai”, Mawdaw mayak na majaw” nga matut tsun dan wa ai re.
Dai Myen hpyen dap hte Pyithutsit hpyen hpung ni gaw, lai wa sai bat 21 ya shani Hpyen man masum hku nbungli hte shawng bawm jahkrat bun, laknak kaba ni gap shadam bun rai na, lagaw lam hku bai htu shadut htim lung wa ai rai nga ai.
Dai Myen hpyen hpung ni Lawa mare du ai hpang, mung shawa ni a U, Wa, Dumsu ni hkrup mara gap sat sha ya nna, mung shawa dum n ta na malu masha arung arai ni hpe mung kam ai hku lagu adup hpaw shaw sha wa ai re.
Ya ten Lawa mare hta hpyen masa matut shaja hkat taw nga nna, mare sin ai masha langai lahkawng hta lai na yawng hprawng yen ma sai re.
Lawa mare masha ni gaw, Namti, Mogaung, Myitkyina ni de yen ai zawn, nkau nam de hprawng yen ai ni mung nga ai lam chye lu ai.
