Sagaing hte Jinghpaw mung jarit, Bamauk ginra kata na
langai hpe pawng hpawm dap maga na bai kalut tat sum kau da sai lam chye lu ai.
Dai shara hta Pawng hpawm dap maga lahkawng ning jan dap jung nga sai shara hpe Sam Hkyeng SNA hte Myen hpyen dap ni madang tsaw Drone laknak hpan hkum hte bai htim gasat wa ai majaw, Pawng hpawm dap maga na tat sum kau ra mat ai re nga, shawng lam hpyen magam gun ni KNG shiga de tsun dan ai re.
“Dai kawng n tsa kaw Dap shara lahkawng nga ai re, dai shara gaw hpyen masa hku tim grai ahkyak ai shara re, Majan gaw laja ai, Myen hpyen dap maga na gaw, madang tsaw ai Drone ni grai lang wa ai, Drone nbungli, laknak kaba hpan hkum hte gap bun wa na htu lung wa yang gaw, ndang hkam wa ai ga rai nga ai, tat sum kau da ra mat ai,” nga tsun dan wa ai re.
Dai ginra hta January 27 ya shani kaw na Majan gap gasat hpang wa ai gaw, Myen hpyen dap maga na, hpyen n’gun laknak n’gun grung grung hte htu shadut htim gasat wa ai hpe pawng hpawm dap maga na February 16 ya shani tat sum kau da ra mat ai rai nga ai.
Ya bai tat sum kau da ai shara gaw, hpyen masa hta ahkyak ai dap shara langai rai nna, Myen hpyen daru magam zing kau ai hpang, PDF dap maga shara la da ai bum kawng marawn mung rai nga ai.
Dai ginra hta Sam Hkyeng SNA dap ni galoi mung hpyen shamu shamawt taw nga ai ginra rai nna, ndai laman hpyen n gun hte htu shadut wa ai hpang Myen the SNA ni bai zing madu kau lu ai mung rai nga ai.
Manmaw de majan laja lana htim gasat taw nga ai ten, Wunpawng Mungdan Shanglawt Asuya maga, PDF ni hpe laknak machyu pala alaw alam n lu garum mat ai majaw, tat sum kau ra ai re nga na PDF dap ni tsun taw ai lam mung nga ai re.
