NUG Rung hpaw na tsun wa ai hte rau Sagaing ginra na Ginwang 5 hta bawm hkan jahkrat
NUG Asuya maga, Sagaing ginra hta rung hpaw na lam tsun wa ai hte rau Myen hpyen dap maga na, Jinghpaw mung hte Sagaing jarit mayan na PDF dap ni zing madu da ai ginra ni de nbungli hte bawm jahkrat ai lam ding yang galaw wa ai re.
Ndai masum mali ya laman hta sha Hti Chyaik, Hkam Pat, Maw Lu, Hummalin, Kalay ginra ni de nbungli bawm wa jahkrat bun ai majaw mung shawa law law asak si sum wa sai re.
Ndai laman Myen hpyen dap nbungli bawm wa jahkrat ai majaw, asak 3 ning re ai ma kaji marai 4 si hkrum wa nna, laga marai 18 si mung si hkrum wa ai lam sagawn chye lu ai.
Hti Chyaik Tung Lung mare hta January 20 ya jahpawt manap jau hkying 2 daram ten hta wa jahkrat bun ai kaw, asak 10 ning ram re ma kaji langai si hkrum wa nna, n kau hkala hkrum wa ai re.
January 16 ya shana Hkam Pat mare nbungli bawm wa jahkrat bun ai hta asak 3 ning re ma kaji hte hpawn marai 4 asak si sum wa nna, marai 10 jan hkala hkrum wa sai re.
Dai zawn sha January 16 ya shana Mawlu mare kaw bawm wa jahkrat bun ai hta mung amyu shayi marai 2 si hkrum wa ai re.
January 17 ya shani hta mung Hummalin Ralardi mare na Ja maw shara mi hta nbungli bawm wa jahkrat bun kau da ai rai tim, masha si hkala ai lam n nga ai hpe chye lu ai.
Dai hpang January 18 ya jahpawt hkying 7 daram ten hta Kalay ginwang kaw bawm wa jahkrat ai hta mung shawa marai 3 si hkrum wa ai re.
Ya na zawn nbungli bawm wa jahkrat bun ai hte seng na Sagaing ginra hta du nga ai KIA magam gun langai KNG de ndai zawn tsun wa ai re.
“Hkam Pat mare hta gaw hpa hpyen masa laklai ai lam mung n nga ai, mung shawa ni zim rai na sha nga taw ai rai nga ai, NUG ni hpa n re Rung hpaw na tsun wa ai majaw, bawm jahkrat bun wa ai ga rai nga ai, shan hte shadu ai she re, ndai de gaw hpa n lak lai ai Rung hpaw na masa hpa mung n hkyen ai, NUG hpyi jaw ai bawm re ga rai nga ai, ya mung shawa n kau gaw hkrit na hprawng sai gaw,” nga tsun ai re.
Myen hpyen dap maga na ya na zawn Sagaing ginra shara shagu bawm jahkrat hkawm wa ai gaw, NUG rung hpaw na lam tsun wa ai majaw re nga na mung shawa ni lapran tsun garu nga ai re.
