Jahtu Zup Ginra hta Majan Byin Wa Na Masa Nga Ai Majaw Ginra Masha Ni Hprawng Yen
Jahtu Zup mare hta, Majan kaba byin wa na masa nga ai majaw, dai makau grup yin hkan na mung mare masha yawng gaw, hkrit tsang nna tinang man ang ai shara ni de hprawng yen taw nga sai lam, dai ginra na mung shawa ni kaw na chye lu ai.
Jahtu Zup, Sanpya, Awng Ra mare ni hta, Majan byin wa mai ai majaw, dai makau hkan na mung mare masha ni jahkring gan yen na matu shara ni hpe hkyen lajang na matu shiga ni mawng taw ai majaw, mung mare masha law malawng hprawng yen wa ai re nga dai ginra na mung shawa langai KNG de ndai zawn tsun dan wa ai re.
“Nambyu Namhkam maga de na Myen hpyen dap hpe htim gasat zing kau sai, ya gaw ndai maga de bai man yawng wa ai ga rai nga ai, dai majaw hkrit na yawng hprawng yen ai ga rai nga ai, ya du hkra chyawm hpa rai n byin ai,” nga tsun ai.
Lai wa sai shata lahkawng hta, Wunpawng Mungdan Shanglawt Hpyendap KIA Dapba (2) Dung 14 ginra, Nambyu Namhkam, Lapu Hka makau na Noije Bum, Nam Kawn maw ginra hkan na Myen hpyen dap ni hpe KIA htim gasat shachyut kau lu sai re.
Maw ginra de na Myen hpyen dap yawng ngu na ram hpe htim shagrawt kau lu ai hpang, Jahtu Zup mare daju Myen hpyen dap Hk.L.Y 297 dap hte Warazup Pyithutsit dap shara ni hpe htim gasat wa na masa nga ai majaw, mare masha ni ya na zawn tau hkrau kaw na hprawng yen ai re nga, ginra masha ni matut tsun dan wa ai re.
Ya na zawn Majan byin wa na shiga ni a majaw, Jahtu zup mare hta gat seng, Ja seng hpaw da ai seng madu law malawng lai wa sai April shata kaw na gat seng yawng hpe pat kau nna, myo mare kaba ni de hprawng yen taw ai lam chye lu ai.
Dai sha n ga, Jahtu Zup, Awng Ra, Sanpya mare ni hta nga ai mung mare masha ni gaw, tinang dum nta wang kata, “ga” gaduk n hkun htu na nga taw ai ni nga ai zawn, nkau nam de jahkring jahkra hprawng yen na shara hkyen lajang ai hte, nkau myo mare kaba ni de sa hprawng yen taw sai lam chye lu ai.
Ya na zawn mung mare masha ni htawt sit hprawng yen taw nga ai lam gaw, Myen hpyen dap hte Pyithutsit dap ni nga ai Jahtu zup mare kata majan byin wa mai ai lam, ginra masha langai KNG de ndai zawn matut tsun maram da ai re.
“Jahtu Zup mare hta Myen hpyen dap nga ai re majaw hkrit na hprawng yen taw nga ai ngu mu ai, rai nbyin shi yang tau hkrau makawp maga ai hku na hprawng yen ai ga rai nga ai, maning mung kalang mare hta gap gasat hkat wa ai, ya mung kalang bai gap hkat wa na masa nga ai majaw, hprawng yen taw ai rai nga ai,” nga tsun ai.
Wunpawng Mungdan Shanglawt Hpyen dap KIA maga na mung mung mare masha ni hpe jahkring gan htawt sit yen na matu ginra masha ni hpe tsun da ai nga rai tim, KNG maga na laksan san shateng lu ai lam n nga ai re.
Jahtu Zup mare hta KIA dap maga na sa htim gap gasat wa ai rai yang, Wara Zup Pyithutsit Min Ze Thant woi awn ai hpung ni kaw na, Bawm sharu bun na ngu tsun jahkrit da ai lam ni mung nga ai nga, Jahtu Zup ginra masha ni tsun ai re.
Ya ten Jahtu Zup ginra hta Min Ze Thant hpung ni kaw na, shani shana drone hte makau grup yin pyen gayin yu taw nga ai zawn, mare kata hkan na nta langai hpang langai pru shang masha jahpan hkan jep ai lam ni galaw taw nga ai re.
Lai wa sai shaning hta Jahtu Zup mare Min Ze Thant Pyithutsit a dap shara hpe KIA dap maga sa htim gap gasat wa yu sai re.
