Waimaw Hpyen Yen Ni Hpe Shara Hkap Jaw La Na hte Nta Shap Manu Shayawm Ya Na Lam Garum Hpyi Shawn

Waimaw Ginwang kata Majan laja wa ai majaw, dai ginra na mung shawa law malawng Myitkyina hkran maga de hprawng yen taw nga ai majaw, ginra masha ni hku na, nta shap manu shayawm ya ai hte hpyen yen ni hpe garum shingtau la na matu, hpyen yen mung shawa ni hpyi shawn nga ai re.

Hpyen yen mung shawa lani hte lani grau grau law jat wa nga ai zawn, Myitkyina mare hta nta shap sha nga ai ni kaw na, nta shap manu hpe mai byin ai daram shayawm ya na hte laga mai byin dang di ai made hpyen yen ni hpe hkap garum la na matu hpyen yen mung shawa ni myit mada ra sharawng nga ai re.

Ya ten Myitkyina muklum kata nta shap manu ni manu tsaw rawt ai lam n nga ai rai tim, ya na manu hpe hpyen yen mung shawa ni ndang di ai majaw, mi shawoi na hta shayawm ya let, laga ja gumhpraw n jaw ra ai htingbut htingra nta wang ni hpe shara hkap madun ai hku na garum la ging ai nga, Myitkyina ginra masha langai ndai zawn tsun ai re.

“Ya Waimaw hkran maga na ni malawng gaw gara de n chye hprawng ai majaw, Myitkyina de hprawng shang wa ai, dai kaw Myitkyina kaw gumhpraw lu ai ni, nta shap sha ai ni gaw manu hkyam sa dik ai hte shara hkap jaw la yang kaja ai, n rai yang yawng gaw grai yak ai,” nga tsun ai.

Myitkyina maga de hprawng yen ai hpyen yen mung shawa n kau, nga shara matut yak hkak taw nga ai rai nna, lu lawm ai ni yawng hkap garum madi shadaw la na myit mada ra sharawng nga ma ai re.

Waimaw maga na hprawng yen pru wa ai mung shawa law malawng hpe ya ten Nawku hpung ni hte hpungkyi jawng ni hta mai byin ai hku shara hkap jahkrat da ya ai re.

Ya ten Waimaw ginra masha law malawng gaw, Myitkyina kata hpaw da ai hpyen yen dabang ni hte jinghku jingyu buga hpung hte hpungkyi jawng ni hta sa machyu shing byi taw nga ai lam hpyen yen ai amyu shayi langai ndai zawn matut tsun dan wa ai re.

“Myitkyina maga de hprawng yen ai ni grau law ai, nkau gaw mi na nga ai hpyen yen dabang ni de yen ai, nkau gaw jinghku nta de yen ai, hpyen yen ni hpe naw jawm garum la marit ngu tsun mayu ai, nta shap sha ai ni mung n’ta manu hpe yawm dik htum ai hku shayawm ya marit ngu mayu ai,” nga tsun ai.

Nta shap ai hta, shata kru na nta shap gumhpraw kalang ta jaw ra ai majaw, ndai lam hpe mung shading sharai nna, mai byin ai hku gram sharai ya na hpe ra sharawng ai lam matut tsun da ma ai re.

May 21 ya shana Shwenyaung Pin Myen hpyen dap hpe htim gasat zing madu kau ai hpang, Myen hpyen dap hpe laknak kaba hte shana tup gap gasat wa ai hpang, ya na zawn Waimaw ginwang kata na mung shawa ni yawng hprawng yen pru wa ai rai nga ai.