Sumpyi Yang Du Nga Ai Myen Hpyen Hpung Ni Mung Shawa U Wa ni hpe Lagu gap sat sha nga
Sumpyi Yang mare hta du nga ai Myen hpyen hpung ni kaw na mung shawa U, Wa ni hpe lagu gap sat sha nna, manu dan ai arung arai ni hpe lagu mya la taw nga ai lam, ginra masha ni kaw na chye lu ai.
Lai wa sai masum ya ram hta, Putao de na yu wa ai Myen hpyen manam ni Sumpyi Yang de du yu wa ai majaw, dai mare hta majan gap gasat hkat wa na hpe myit tsang ai mung mare masha yawng nam de hprawng yen ma ai re.
Mung mare masha ni hprawng yen kau da ai dum nta hkan Myen hpyen dap ni ya na zawn hkrup mara kam ai hku lagu mya sha rawng taw nga ai nga, dai ginra na mung shawa langai KNG shiga dap de tsun dan wai re.
“Ya hte Putao kaw nbungli hte wa htaw sa da ai hpyen manam ni Sumpyi Yang kaw du nga ai, mare masha ni gaw hkrit na yawng hprawng ma sai, mare na U, Wa ni hpe Myen hpyen ni hkrup mara gap sat sha taw ai, gat seng hpaw da ai nta hkan mung adup hpaw na shan hte ra ai ni la mat ai,” nga tsun dan ai re.
Dai Myen hpyen manam ni hpe lai wa sai bat hta, nbungli hte Putao kaw wa htaw sa da ai hpyen n-gun 100 jan nga ai hpyen hpung ni re lam chye lu ai.
Dai myen hpyen hpung ni Tangja kaw na Sumpyi Yang maga de lai yu wa ai ten, lam lapran kaw KIA hkap shingla gasat ai hta, Myen hpyen dap maga hkra machyi ai lam ni nga wa ai re.
Lai wa sai May praw 5 ya jahpawt Sumprabum Myen hpyen dap hpe KIA dap maga htim gasat zing madu kau ngut ai hpang, Hpung Chyan Myen hpyen dap hpe bai htim gasat na hkyen ai ten Myen hpyen dap ni hprawng mat ai re.
Ya ten lahkawng maga na hpyen n’gun Sumpyi Yang makau grup yin ni hta du taw nga nna, ndai laman Majan kaba byin wa na masa nga ai lam ginra masha ni tsun maram nga ma ai re.
