Mogaung Point Phyu Myen Hpyen Dap Shagyit Hta, Hpakant Lung Seng Htu Company Mawdaw Kaba 6 Hpe Wan Nat Jahten
Mogaung hte Hopin mare lapran hta dung ai Point Phyu Myen Hpyen dap shagyit kaw na, Hpakant Lung Seng Htu Company hta lang na, Ga Htaw mawdaw kaba 6 hpe hkap rim nna, wan nat jahten kau ya ai lam ginra masha ni kaw na chye lu ai.
Hpakant Lung Seng htu Company hta lang na ga htaw mawdaw kaba hpe Myen hpyen dap hte SNA dap ni kaw na April 27 ya shani Point Phyu gate hta hkap rim kau ya ai hpang, mawdaw langai hpe gumhpraw Sen hkying mi manga tsa (150,000,000) hte shaw la na matu, Myen hpyen dap maga tsun wa ai hpe, Company maga na n lu jaw ai majaw, dai mawdaw kaba yawng hpe nat jahten kau ya ai nga, ginra masha langai ndai zawn tsun dan wa ai re.
“Hpaknt Lungseng Company na mawdaw kaba 6 hpe Point Phyu Gate kaw hkap rim kau ya ma ai da, hkap rim ai mawdaw langai sen 1500 hte bai shaw la shangun ai hpe Company maga na n lu jaw ai majaw, wan nat jahten kau ya ai, wan nat jahten na n hkru ma ai hpe bawm hte bai galaw kapaw jahten kau ai nga ai,” nga tsun dan wa ai re.
Dai Company mawdaw kaba ni hpe Myen hpyen dap kaw hkawn kang yawng bang ngut na Hpakant de lung wa ai hpe, ya na zawn lam lapran gumhpraw hkap hta ai hpe Company maga na dai ram law n lu jaw ai majaw, nat jahten kau hkrum wa ai rai nga ai.
Dai Mawdaw kaba ni hpe nat jahten na n hkru hten ma ai ni hpe gaw, Bawm hte kalang bai yawng kapaw jahten kau ya ma ai re lam chye lu ai.
Ya nat jahten hkrum ai mawdaw kaba ni gaw, gadai gara Company na mawdaw kaba ni re ai ngu hpe KNG maga a tsawm n lu sagawn shi ai re.
Myen hpyen dap maga ya na zawn Mawdaw kaba ni wan nat kapaw jahten kau ya ai hpang, Hopin dap kaw na, KIA PDF dap ni nga ai, Mung Nyang Hka Sinpraw maga de laknak kaba ni gap shadam bun wa ai re.
Ya ten, Wan Leng lam mayan hta Myen hpyen dap hte Sam Hkyeng SNA dap ni kaw na, lai sa lai wa mung mare masha ni hpe laja lana san jep taw nga nna, shan hte n tsen n hten ai ni hpe mung rim ahkyak la ai lam ni galaw taw nga ai re.
