Nmawk, Manmaw muklum kaba ni hpe ntat sum hkra Myen hpyen dap maga na hpyen n gun kaba hte Hka Nan, Hku Li, Lung Ja Bum maga de bai htu shadut wa ai majaw, KIA dap hte majan bai gap gasat hkat taw nga sai re.
Nmawk hte Manmaw muklum hta gahkyin tawn da ai Myen hpyen n-gun hkying lam hte ya ten, Nmawk Hka Nan hte Lung Ja bum mayan ni de bai htu shadut bang wa taw ai majaw, dai hpawt kaw na majan bai gap gasat hkat nga sai lam, shawng lam magam gun langai KNG shiga dap de tsun dan wa ai re.
“Myen hpyen dap maga bai htu shadut htim gasat wa ai ga rai nga ai, Manmaw maga na mung, Nmawk na mung, myo shinggan ni de shara ni bai la wa ai, dai hpawt kaw na gaw Hka Nan lawk Kahtawlik nawku jawng makau hkan majan byin nga ai, Hku Li, Na Lai maga ni de mung majan byin taw nga ai,” nga tsun ai re.
Dai hpawt majan byin wa ai shara ni gaw, Hku Li, Na Lai, Hka Nan lawk maga ni de rai nna, lahkawng maga dap na laknak kaba gap hkat ai hpang, Myen hpyen dap maga de na nbungli ni hte mung sa gap gasat wa ai re.
Ya ten Nmawk mare makau grup yin hte muklum kata na hpaji jawng, balik dap ni hta Myen hpyen n gun kaba jahkrat da nna, KIA dap ni gaw Lung Ja Bum, Wa Wang, Kum Bang, Jahkan Dap ni hta nga taw nna, laknak kaba gap bun hkat taw ai re.
Sinlum Bum Myen hpyen dap hpe htim gasat zing madu kau ngut ai hpang, Nmawk mare kaba makau grup yin ni hta KIA dap shara la taw nga ai n htoi 20 ya hkawt na wa ai hpang, ya na zawn laknak kaji kaba hte gap gasat hkat wa ai rai nga ai.
KIA dap maga shara la da ai nhtoi na wa ai hte rau, Myen hpyen dap maga bai htu shadut wa ai lam mung rai nga ai.
Ya na zawn Myen hpyen dap maga na shawng bai htu shadut wa ai lam gaw, ninghkap majan a matu tau hkrau na hkyen lajang ai hku na htu shadut wa ai re nga, mung masa yu maram ai ni tsun ai re.
