Majan ShigaShiga
Lani Mi Laman, Myo Thit, Kung Law Mayan Na Myen Hpyen Dap Shara 4 Hpe Htim Gasat Zing
Dai ni lani mi laman, Dawhpum Yang hte Nmawk lapran na Myen hpyen dap shara 4 hpe htim gasat zing madu la lu ai lam, Dukaba Naw Bu tsun ai re.
Dai hpawt manap jau, Kung Law Myen hpyen dap Hk.M.Y (387) dap hpe htim gasat zing madu ai hpang, Sihat hte Myothit lapran na Hk.M.Y (320) hte hpawn, Salawng Kawng hte, Lung Ja Bum mayan na Myen hpyen dap shara (4) hpe zing madu kau lu ai lam tsun dan wa ai re.
“Myohtit, Kung Law, Lung Ja Bum, Salawng Kawng dai hte (4) hpe zing la lu ai lam tara shang shana wa ma ai lo.” nga tsun ai re.
Nmawk Mare makau na Lung Ja bum gaw lai wa sai 2022 October shata hta KIA tat sum kau ai dap shara rai nna, dai ni bai zing madu la lu sai rai nga ai.
Myen hpyen dap hpe htim shagrawt taw nga ai hta, Nmawk mare kaba makau de du wa nga sai rai nna, dai ginra na mung shawa ni mung tinang man ang ai shara ni de hprawng yen hkawm taw nga ai re.
Ndai laman Dawhpum Yang hte Nmawk lapran na Myen hpyen dap dung ni hpe htim gasat taw nga ai hta, Myen hpyen dap maga sum machyi lam ni law nna, Manmaw de hprawng yen ma sai lam, dai ginra na mung shawa ni tsun ai re.
