Mung Hkawng Hte Nam Lim Pa Grup Yin Na Myen Hpyen Dap Shara (5) Na Myen Hpyen Hpung Ni Hprawng Yen
Jinghpaw Mung hte Sammung Jarit, Mung Hkawng hte Namlim Pa grup yin na Myen hpyen dap shara 5 na hpyen hpung ni yawng hprawng yen mat sai lam, ginra masha ni kaw na chye lu ai.
Mung Hkawng Mare kata dap jung tawn ai Myen hpyen dap hte hpawn, Namlim Pa, Bang Htan, Loi Hkam, Man Gau, shara ni hkan na Myen hpyen dap yawng, ndai laman hprawng yen ma sai lam dai ginra na mung shawa langai KNG shiga dap de tsun dan wa ai re.
“Namlim Pa, Bang Htan, Loi Hkam, Man Gau, dai ni gaw yawng yu mat wa sai, Si Hkam Gyi hpe gasat kau ai hpang dai de shan hte nga n mai nga re majaw yawng yu wa sai ga rai nga ai, shan hte hkrai mayun pru mat wa ai dai hpe Nam Lim hte Si Hkam Gyi lapran sun galaw sha ai ni mu dat ai, shan hte htingga gun na pru mat wa ai ” nga tsun dan ai re.
Dai dap shara ni gaw, lai wa sai 2015 ning daram kaw na wa du dap jung tawn ai Myen hpyen dap shara rai nna, ndai laman Myitkyina Manmaw ntsa na hpyen majan ni hta Myen hpyen dap sum machyi law wa ai majaw, dai ginra na hpyen n-gun yawng hpe Manmaw de dawm la kau ai masa re lam ginra masha ni tsun ai re.
Mung Hkawng mare kata hta dap jung nga ai Myen hpyen dap ni hpe KIA dap maga, hpyen n-gun 200 daram hte htim gasat na hkyen wa ai ten, Myen hpyen dap maga ya na zawn hprawng yen kau da ai re nga Mung Hkawng ginra masha langai ndai zawn matut tsun dan wa ai re.
“Anhte Mung Hkawng na ni hpe mung gap na hkyen sai nga shiga na na dai shana hta sha anhte maga de na ni ma hpyen n-gun 200 daram hte yu wa rai jang gaw, shan hte hpe ma tsun da ai da, sumpan hpraw sharawt, n rai jang pru yang pru, n pru jang gap na ngu tsun da ai da, dai kaw bum na ni du hkrat wa ai shiga na ai hte rau anhte hpe gap hkyen sai ngu na hprawng pru mat ai masa re ngu maram lu ai law” nga tsun dan ai re.
Mung Hkawng mare na hprawng gale pru mat ai Myen hpyen hpung ni gaw, shan hte a laknak machyu pala n kau hpe hka de gabai bang kau da ai lam ni nga ai hpe matut chye lu ai re.
Ya ten dai kaw na gale pru mat ai Myen hpyen hpung ni gaw, Manje mare de wa pawng hpawm taw nga ai re.
Ndai laman Manmaw mare kaba hta majan kaba byin wa na masa nga ai majaw, dai ginra na mung shawa ni yawng tinang man ang ai shara ni de hprawng yen taw nga sai rai nna, n kau gaw tinang dum nta kata ga nhkun gaduk htu shagreng let nga taw ai lam matut chye lu ai.
