Hopin mare kaba Nan Hkwi hte Pwint Phyu lapran na, Mung Nyang Hka mahkrai lahkawng maga de, ga gaduk n-hkun htu nna, Myen hpyen dap, dap shara jahkrat na matu hkyen shajin taw nga ai lam ginra masha ni kaw na chye lu ai.
February 23 ya shani kaw na, Hopin mare a sinpraw maga Nan Hkwi hte Pwint Phyu lapran na Mung Nyang Hka mahkrai lahkawng maga hta, Back Hold hte ga n hkun sa htu nna, Myen hpyen dap hte Sam Hkyeng SNA dap ni pawng hpawm hpyen n-gun 100 daram hte dap jung shara jahkrat na hkyen taw nga ai lam, Hopin KPDF dap na lit nga ai Salang langai KNG de ndai zawn tsun dan wa ai re.
“Ndai zawn dap jung shara jahkrat wa na hkyen ai majaw, hpyen masa shaja hkat taw nga ai, mani gaw laknak kaba hte loi li gap bun hkat taw ai, ya shan hte gaw mahkrai hpe jahten ai hku n re sha, mahkrai n mai lai na hku htu di da ai ga rai nga ai.” nga tsun dan ai re.
Myen hpyen dap hpyen la n galaw n mai tara upade shapraw dat ai ai hpang, Mogaung hte Monyin lapran ramma ni hpe rim ahkyak la ai lam law wa ai zawn, February 23 ya shani kaw na dai shara hta ya na zawn sa htu nna, dap jung shara jahkrat wa ai re lam matut tsun ai re.
Myen hpyen dap maga ya na zawn, mung shawa ni yawng akyu jashawn jai lang nga ai hka mahkrai hpe sa htu di wa ai majaw, February 25 ya shani KPDF dap hte Myen hpyen dap ni majan gap gasat hkat wa ai re.
Ya ten Myen hpyen dap gaw dai ginra na mung mare masha ni hpe jahkrit shama let, dai shara hpe ma ja sa htu nna, dai shara hta dap jung shara jahkrat na hkyen taw nga ai lam ya na zawn matut tsun ai re.
“Mungnyang Hka ndai hkran maga de KIA PDF dap ni nga ai hpe shan hte chye ai, dai ni Hopin de n lu shang hkra ngu ai hte ya na zawn galaw wa ai ga rai nga ai, ndai laman Myen hpyen dap ni dai makau grup yin hpyen shamu shamawt nna mung shawa ni hpe jahkrit sharim ai lam ni mung nga ai, ya dai kaw htu di kau ai majaw mung shawa ni galaw lu galaw sha lam hta mung yak mat sai,” nga tsun ai re.
Ya ten Myen hpyen dap hte SNA dap ni dai ginra hta hpyen masa shamu shamawt ai lam ni ding yang galaw taw nga nna, mung mare masha ni hpe jahkrit sharim ai lam ni mung nga taw ai hpe chye lu ai.
Myen hpyen dap maga ya na zawn mahkrai htu di nna, dap jung shara jahkrat mat ai majaw, dai ginra na mung shawa ni ai hkau hting hkau na galaw lu galaw sha lam ni hta yak hkak mat sai majaw, mung mare masha ni myit tsang nga ma ai re.
Myen hpyen dap maga ya na zawn hpyen masa matut shamu shamawt taw ai rai yang, dai ginra hta majan laja wa na masa nga ai lam ginra masha ni tsun maram da ai re.
Hopin muklum hte deng 2 daram sha tsan ai Mung Nyang Hka mahkrai hta Myen hpyen dap dap jung shara jahkrat na hkyen ai majaw, hpyen shamu shamawt taw nga nna, Majan laja wa na masa nga taw ai majaw, mung shawa ni hkrit tsang taw nga ma ai re.
