Manmaw muklum numshang deng 5 Sihe shagyit hta mung shawa La wa-ngan marai 14 hpe Myen hpyen dap ni hkap rim woi da ai lam ginra masha ni kaw na chye lu ai.
Rim woi hkrum ai mung shawa marai 14 gaw, lai wa sai February 18 ya shani Jehkam mare hta Myen hpyen dap nbungli hte laja lana wa gap bun ai majaw, hprawng yen pru wa ai mung shawa ni rai nna, Manmaw de hprawng yen lung wa ai ten hkap rim woi la hkrum ai mung shawa ni re lam dai gina na mung shawa langai KNG de tsun dan ai re.
“Ya rim woi hkrum ai ni gaw, Jehkam mare makau Pan Tai mare de nbungli hte laja lana sa gap bun wa ai majaw, hprawng yen pru wa ai ni rai nga ai, Manmaw de hprawng yen lung wa ai ten hkap rim hkrum ai ni re.” nga tsun dan ai re.
Ya rim woi hkrum ai mung shawa marai 14 gaw, Pan Tai mare Shwe Chyin Taw de na sengke hte pru wa nna, dai sengke ni hpe Man Tana mare shara mi hta tawn kau da nna, mawdaw kaba hte hkan jawn lung wa ai ten, Sihe Deng 5 shagyit hta hkap rim woi la hkrum ai nga tsun ai re.
Dai hkap rim woi la hkrum ai hta, asak 16 ning kaw na 40 ning lapran nga ai mung mare masha ni rai nna, Pantai, Nga Oo, Sikaw, Ma-U Pin, Pyachyawng mare hkan na ni re lam chye lu ai.
Rim hkrum ai dum nta masha ni hku na, mare salang ni a madi shadaw laika la nna, Myen hpyen byuha dap de lawan bai dat ya na matu wa hpyi shawn ai rai tim, ya ten du hkra dat ya ai lam rai n nga shi ai hpe chye lu ai.
Lai wa sai February 16 ya shani Jehkam Myen hpyen dap hpe KIA woi awn ai pawng hpawng dap ni sa htim gap gasat hpang wa ai kaw na, dai ginra hta nga ai mung shawa yawng Manmaw maga de hprawng yen taw nga ai re.
Lai wa sai February 17 ya shani hta mung Rahkaing mung daw na Mg Thar Heing ngu na wa dai shagyit hta sha hkap rim hkrum wa sai re.
Ya ten dai ginra hta hpyen masa lam matut shaja hkat taw nga nna, Myen hpyen dap maga laknak kaba ni hte gap shadam bun ai lam ni ding yang matut galaw taw nga ai re.
