Hpakant Gwihka Myen hpyen dap hpe htim gasat zing kau ai hpang, dai makau grup yin hta si hkrum ai Myen hpyen moi mang ni hpe mung shawa ni htu lup ra taw nga ai nga, dai ginra na mung shawa ni tsun ai re.
Ya ten Gwihka mare mung shawa yawng hpyen yen yen mat sai rai nna, nta sin na ngam taw ai salang n kau mai byin ai hku na sha htu lup ya taw nga ai nga dai ginra na mung shawa langai KNG shiga dap de ndai zawn tsun dan wa ai re.
“Ya hte Gwihka Myen hpyen dap hpe htim gasat ai hta, Myen hpyen dap maga marai 20 daram si ai, dai hpe mare mung shawa ni hpe htu lup shangun taw ai ya, 21 ya shani du hkra gaw marai 12 hpe htu lup ngut sai, ya naw ngam ai,” nga tsun dan wa ai re.
Dai zawn htu lup ai hta, January 21 ya shani Myen mang 12 hpe htu lup ngut sai rai nna, ya matut naw ngam ai lam chye lu ai.
Gwihka Myen hpyen dap kawng htim gasat hkrum ai ten, Myen hpyen dap ni hprawng yen ai hpe KIA hte PDF dap ni hkan htim gap gasat ai majaw, Myen hpyen mang law malawng nam hkaraw hkan na hkan hta lup ra taw ai re.
Gwihka Myen hpyen dap kaw na hprawng mat wa ai Myen hpyen Dukaba Tsan Lwin hte hpyenla n kau hpe sa tau la ai Myen hpyen hpung ni hpe KIA PDF dap ni Seng Tawng lup wa makau kaw hkap shingla gasat ai hta mung Myen hpyen dap maga si hkala law wa ai re.
Dai hkap shingla gasat ai hta, Myen hpyen mawdaw langai n ga kran rai taw ai lam, dai ginra na mung shawa ni tsun ai re.
Dai kaw na hprawng mat wa ai Myen hpyen la marai 5 hpe KIA dap maga de na bai hkan shachyut wang rim la lu ai re lam chye lu ai.
Ya ten Hpakant hta majan gap hkat ai lam n nga ai rai tim, Myen hpyen byuha kawng kaw na laknak kaba ni hte shana shagu gap shadam bun taw nga nna, hpyen masa matut shaja hkat taw nga ai re lam chye lu ai.
