Myen hpyen dap gaw mungdan ting madang majan sum machyi taw nga ai majaw, mara kata mung shawa ni nga ai shara ni de, nbungli hte htim gasat ai nga, dingdung daw dap hpawm hpung maga ndau da ai re.
January praw 7 ya shana maga de hkying 2 daram hta, Balawng uphkang gaiwang, Namsan, Myo Thit mare hta Jet nbungli hte bawm 5 lang sa jahkrat bun ai hta, jawng sarama langai hte hpawn mung shawa marai 5 asak si sum wa nna, marai 6 hkala sawng wa ai lam tsun da ai re.
“Gumshem Myen hpyen dap kaw na majan hte n seng ai mung shawa ni nga ai shara ni hta yaw shadaw lam nga nga hte nbungli wa gap bun ai lam, mung shawa ni hpe n tara rim ahkyak la ai lam hte shinggyim ahkaw ahkang tawt lai taw nga ai re,” lam n dau da ai re.
Matut na rai tim, PDF dap ni up madu da ai, Sagaing Hkam Pat ginwang, Kanan mare hta Jet nbungli hte bawm sa jahkrat bun ai majaw, ma kaji marai 5 hte hpawn, mung shawa marai (17) asak si hkrum wa nna, n kau mung shawa law law mung hkala hkrum wa ai lam chye lu ai.
January praw 7 ya jahpawt hkying 10 daram hta Hkam Pat Kanan mare nawku jawng langai hta nawku taw nga ai ten, Myen hpyen dap nbungli hte sa jahkrat bun na, asak si sum wa ai re lam tsun da ai re.
Myen hpyen dap gaw, ya ten Myen mungdan shara shagu hta majan sum machyi taw ai majaw laknak kaba gap sharu bun ai hte, nbungli hte wa gap gasat ai lam ni galaw nga ai re.