Maran Kahtawng Mare Shawa Ni Hpe Myen Hpyendap Jahkrit Shagyeng
![](https://kachin.kachinnews.com/wp-content/uploads/2023/12/406072034_1063905411628239_5824182588709923370_n-1.webp)
Lido lam kaba ntsa, Namti-Maran Kahtawng hta ‘majan byin wa yang, mare ting hpe wan nat kau ya na’ nga nna, Myen hpyen dap tsun jahkrit wa ai nga, ginra masha ni tsun ai re.
Maran kahtawng hta dap jung ai Myen hpyen dap gaw, mare kata ngam ai salang hte mung mare masha ni hpe shiga la nhtawm ‘KIA-PDF dap ni bai sa gap ai rai yang mare ting hpe wan nat jahten kau na hte, mare kaw na hprawng yen mat ai ni hpe lawan bai shaga mahkawng na matu’ tsun da ai nga, ginra masha langai KNG de ya na zawn tsun dan wa ai re.
“Mare kaw majan bai byin wa yang, mung shawa ni hpe rim adup zingri wa na hpe tsang ai majaw, n kau hprawng yen ma ai, mare kata hkan shang hkawm nna, KIA PDF shang wa yang shiga jaw na matu alang lang tsun ai, n tsun na majan byin wa yang sat na nat na, shan hte hpe makawp maga ya na matu hkan tsun ai. ngut na hpyen yen mat ai ni hpe mung lawan shaga mahkawng n rai yang nta yawng nat kau ya na,” nga tsun dan wa ai re.
Maran kahtawng, Myen hpyen dap shagyit hpe sa htim gap gasat ai hpang, mare hta majan bai byin na hpe myit tsang ai hte, Myen hpyen dap maga na mung ya na zawn tsun jahkrit da ai majaw, dai mare na mung shawa hting gaw 50 daram gaw, Namti Mogaung mare kaba ni hta sa du hprawng yen taw nga ai, nhtoi 10 ya jan na wa sai re.
Maran kahtawng hta dum nta htinggaw 100 daram nga ai re.
November 25 ya jahpawt, Maran Kahtawng Myen hpyen dap shagyit hpe KIA hte PDF dap ni sa htim gap gasat dat ai hpang, Myen hpyen la marai 30 daram gaw, Nawku jawng wang hta Chyuju dum poi galaw nga ai mare salang marai 5 hpe sa rim woi mat ai hpang adup gayet zingri nna, November 28 ya shani bai dat ya ai re lam chye lu ai.
Maran Kahtawng hta Myen hpyen n-gun 50 daram hte dap jung shara jahkrat nna, Danai Hpakant de hkawm sa ai mung shawa ni hpe laja lana san jep ai shagyit mung rai nga ai.