Mogawng hta Myen Hpyendap Laknak Kaba majaw, Mungshawa Dum Nta ni Hten Mat
![](https://kachin.kachinnews.com/wp-content/uploads/2023/08/370357568_316792811021371_6205760820192041457_n.webp)
Mogaung, Ts.K.Hk (3) Myen hpyendap kaw nna Maran Kahtawng maga de laknak kaba gap bun wa ai majaw, mung shawa nta hkra hten ai lam ni nga wa ai lam, dai ginra na mung shawa ni kaw na chye lu ai.
November 25 ya shani Maran Kahtawng shagyit hpe KIA Dung 11 ni sa htim gap gasat dat ai ten, Mogaung Myen hpyen dap Ts.K.Hk (3) kaw na, laknak kaba 50 lang jan gap bun ai majaw, dai ginra na mung shawa n ta hkra hten ai lam ni nga wa ai nga, dai ginra na mung shawa langai KNG shiga dap de tsun dan ai re.
“Asak 10 ning daram re la kasha langai bawm hkyep wa hkra ai majaw, hkala hkrum wa ai, bawm hkyep wa hkra na hprit tsut waw, shakum waw re nta 5 daram hten wa ai ga rai nga ai,” nga tsun dan ai re.
Myen hpyen dap laknak kaba gap bun ai majaw, hten mat ai nta ni gaw, Srn. Laha Hkawng Naw, Slg. Labya Brang Din, Slg. Hkingjawng Zau Nan hte Ndawng Nta ni re lam chye lu ai.
Laknak kaba grai hkrat bun wa ai majaw, mung mare masha ni hprawng yen na hkyen ai hpe, Myen hpyen dap maga gadai mung n hprawng yen lu na hte hprawng yen ai dum nta ni hpe wan nat jahten kau ya na lam tsun jahkrit wa ai lam nga ai hpe matut chye lu ai.
KIA dap maga Maran kahtawng Myen hpyen shagyit hpe sa htim gap gasat ai majaw, hkrun lam hkawm mawdaw lam kaba hpe shani ting pat kau nna, shana maga she bai hpaw ya ai re lam chye lu ai.
Maran kahtawng Myen hpyen dap gaw, hkrun lam hkawm mung mare masha ni hpe laja lana san jep taw ai shara rai nna, ding bai ding na jaw dik shagyit langai mung rai nga ai.