Monyin, Mawhan, Namhkyi Maw hta dap jung nga ai Myen hpyen dap hpe, Wunpawng Mungdan Shanglawt Hpyen dap KIA dung 35 ni htim gasat zing madu kau sai lam chye lu ai.
November 18 ya shana kaw na, Namhkyi Maw Myen hpyen dap hpe KIA dap maga de na htim gasat wa ai hta, November 19 ya jahpawt zep zi zing madu la kau lu sai nga, dai ginra na mung shawa langai KNG shiga dap de ndai zawn tsun dan ai re.
“Kru ya shana kaw na, KIA dap maga na htu shadut htim gasat hpang wa ai, hpang jahpawt rai yang yawng zep zi zing kau sai, dai dap gaw Namhkyi Lungseng maw hpe sin makawp ai dap rai nga ai, ngut na dai dap shara hpe Bilat gaduk ni hte kring mading galaw da ai gaw rai nga ai,” nga tsun dan ai re.
Namhkyi Maw hta dap jung nga ai Myen hpyen hpung ni gaw, lai wa sai 2012 ning kaw nna, hpyen n-gun 40 daram the dap jung nga let, Namhkyi maw hte Mawhan ginra na, Ja Maw, Lung Seng Maw, Hpun lawk ni hpe yu up madu taw nga ai dap shara re lam ginra masha ni matut tsun dan ai re.
Dai dap shara hpe htim gasat zing madu ai hta, Myen hpyen dap maga laknak loi li hte, n-gu buk 50 daram hpe zing madu la lu ai lam chye lu ai.
Ya htim gasat zing madu la lu ai shara gaw, Hpyen masa lam hta ahkyak ai dap shara rai nna, Sagaing hte Jinghpaw mung jarit, mayan na, dap jau lam re lam matut chye lu ai.
Lai wa sai November 17 ya shani hta mung, Mungmyit Sinli Mung Ya Namhpa mare na Myen Hpyen dap Hk.M.Y 567 dap hpe sa htim gap gasat zing madu kau lu ai lam nga ai hpe chye lu ai.
