Hkyen Bum ntsa, Hkawng Lan Phu, Shing Hkawng mare dum nta 200 jan wan hkru mat ai majaw, mung mare masha ni garum ningtum ra ahkyak taw nga ai lam, ginra masha ni tsun ai re.
November praw 7, manap jau hkying 2 daram aten hta, nta langai wan hkru hpang wa ai kaw na, mare ting wan hkrawn mat ai re lam, dai ginra na mung shawa langai KNG shiga dap de ndai zawn tsun dan ai re.
“Bum ntsa na layang hte yang na nta yawng lawm mat ai, mare masha ni shaning ting na mahkawng da ai malu masha hte arung arai yawng lawm mat ai ga rai nga ai, dai majaw ya ten grai yak taw nga ai,” nga tsun dan ai re.
Dai mare hta nta hting gaw 300 jan nga ai kaw nna, dum nta 200 jan hkru lawm mat ai re. Miwa ga de na mari mahkawng da ai malu masha hte arung arai ni yawng hkru lawm mat ai nga, ginra masha ni tsun dan ai re.
Shing Hkawng mare gaw, hkyen bum ntsa de da ai mare kaba langai rai nna, hkrun lam matut mahkai yak dik shara mung rai nga ai.
Miwa chyinghka hpaw nna, malu masha mari mahkawng da ai shata 2 sha naw rai yang, ya na zawn wan hpyen hta hkru lawm mat ai ntsa ginra masha ni myit yawn nga ai re.
Lai wa sai ten dai shara hta hkrun lam hkawm ai masha law dik shara rai nna, Covid ana byin wa ai ten, Miwa chyinghka lam pat kau ai kaw na, mung mare masha ni yak hkak wa ai rai nga ai.
Ya na zawn hkrun lam yak hkak ai hkyen bum ntsa na, mung mare masha ni wan hpyen hkrum ai majaw, ya hkyak hkyak labu palawng, banep nba hte dinghku lang arung arai hte malu masha ni ra ahkyak taw nga ai re.
