Muse makau Namtau mare hte Hpahpik mare matut tawn ai lam hpe, Myen hpyendap htu di kau nna bawm hkam tawn ai majaw, bawm kabye kapaw la hkrum ai mung mare masha marai 3 rai sai lam, ginra masha ni kaw na chye lu ai.
October 10 ya shana de, Hpahpik mare na kawa la langai, Namtau kaw nna dum nta de lagaw lam hku lai wa yang, dai shara hta Myen hpyendap hkam tawn ai bawm kabye kapaw la ai majaw, ningma sawng nna, ya ten muse tsi rung hta tsi tsi hkam la ra nga ai lam, ginra masha langai KNG shiga dap hpe n dai zawn tsun ai re.
“Myen hpyen hpung ni lam htu di da ai makau kaw Bawm hkam da ai ga rai nga ai, dai hpe mung shawa ni n chye nna lai hkrup ai nga yang kabye kapaw la ai ga rai nga ai. anhte chye ai daram nga yang marai masum rai sai. mani mung langai bai kabye kapaw la ai, lagaw hkala sawng ai, ya muse tsi rung de sa da ai,” nga tsun dan ai re.
Bawm kabye kapaw la ai wa gaw, Hpahpik mare na, asak 30 jan re Slg Lashi La re lam chye lu ai. Dai kawa la gaw, October 11 ya shana de hkying 3 ram aten bawm kabye kapaw la hkrup ai lam matut chye lu ai.
Lai wa sai August shata 15 ya shani, Namtau hte Hpahpik hpe matut ai lam shara mi hta Myen hpyendap maga backhole hte shawng ningnan lang wa htu di kau ya ai rai nga ai.
Dai hpang, Balawng TNLA dap maga Myen hpyendap htu di tawn ai lam hpe bai wa kaput gram lajang nna, hkawm sa mai sai lam online ntsa hkan shiga bai shapraw wa ai re.
Dai zawn gram lajang tawn ai 2 ya sha naw rai yang, August 27 ya shani kalang bai, Myen hpyendap gaw Baduza jak kaba hte lung wa nna, grau sawng hkra bai sa htu waw kau ya ai re lam chye lu ai.
Myen hpyendap kaw nna, shawng nnan lang lam htu shaloi bawm hkam ai lam nnga tim, lahkawng lang ngu na, lam bai wa htu waw ai shaloi Bawm mung kalang dat hkam kau da ai re lam tsun ai re.
Dai zawn, Myen hpyendap maga lam htu di nna, bawm hkam kau da ai hpang, August 30 ya shani, 105 mile na, Zaibru htaw ai mawdaw la langai, dai lam hku lai wa hkrup nna, lam hten taw ai majaw, yu nna, sa hkawm yu ai kaw, Bawm kabye kapaw la nna, hkala hkrum was ai re.
Dai hpang, September praw hta sha, Pangsai de na miwa la langai mung, Yi sa ai ngu yang, dai lam hku lai hkrup nna, Bawm kabye kapaw la lam byin wa ai sai re.
Myen hpyendap gaw lam htu di nna ga hte shingbut tawn ai shara lahkawng maga group group bawm hkam tawn ai majaw, ya na zawn, lai hkrup ai mung masha ni bawm kabye hkrum nga ai re lam chye lu ai.
Hpahpik hte Namtau gaw deng 2 sha tsan hkat ai hpe, Myen hpyendap ni lam htu di kau ya ai majaw, ya ten namtau kaw nna Hpahpik de wa na rai yang, deng 10 daram tsan ai lam hku kawoi nna, hkawm sa ra nga ai lam chye lu ai.
