Manmaw muklum kata, Myen hpyendap gaw lam nmaw n tsa hkawm sa taw nga ai ramma ni hpe mara kata rim woi mat ai lam chye lu ai.
September 18 ya shana maga de Manmaw mare numshang, Goft pa makau hta Myen hpyen dap hte balik ni pawng hpawm nna, ramma marai 10 jan hpe rim woi mat ai nga, Manmaw ginra masha langai KNG shiga dap de tsun dan ai re.
“Myo de shang wa ai Goft pa lam numbraw kaw hkap nga na, lai wa ai yawng hpe hkap rim taw nga ai, ya rim hkrum ai ni gaw ramma ni re, ya shan hte ramma ni shada tsun hkat taw ai marai 10 daram rai sai. pru wa shang wa yawng hpe hkap rim ai.” nga tsun dan ai re.
Rim woi hkrum ai hta, ramma la kasha ni hkrai rai nna, pru wa shang wa ai ni yawng hpe hkap rim taw ai re lam matut chye lu ai.
Myen hpyen dap ni rim woi da ai masha jahpan hpe a tsawm tup hkrak n chye lu ai rai tim, marai 10 hta n yawm ai nga tsun dan ai re.
Ndai ten Myen hpyen dap ni kaw na ramma ni hpe, mara kata rim woi ai lam gaw, majan laja taw nga ai, hpyen man de hpyen ninggang shatai woi hkawm na matu, rim woi ai rai na re nga, ginra masha ni tsun maram da ai re.
Myen hpyen dap ni ya ten, Namsan hpyen man maga de lu sha hte laknak arung arai htaw shalai lu na matu yak hkak taw nga ai sha n ga, sum machyi lam law taw nga ai re hpe chye lu ai.
