Danai mare num shang, deng (5) Myen hpyen dap shagyit hta, Kani hpraw kawk 19 hte tsi hkyep ni hpe hkap mu rim da ai lam chye lu ai.
August 28 ya jahpawt Hopin kaw na Danai de lung wa ai Shwe Nyi Ko gate na AD-Van mawdaw kaji langai hpe hkap sawk jep ai hta, mu jep shapraw ai re lam, ginra masha ni kaw na chye lu ai.
Mu jep ai jahpan ni gaw, Kani hpraw kawk 19, tsi hkyep 25,000 rai nna, dai arai ni hte hpawn,mawdaw kaw jawn lawm wa ai amyu shayi lahkawng hpe Danai balik dap hta rim da ai lam chye lu ai.
Ndai zawn kani nang hpam hkap lu rim ai hte seng na, ginra Patajasan na lit nga ai Salang langai KNG shiga dap de ndai zawn tsun dan ai re.
“Myen hpyen dap ni hkap lu rim ai gaw nga ai, gade ram gara hku lu rim ai chyawm n chye ai, mung masa n pyaw ai ten re majaw, anhte ginra Patjasan ni mung hpa bungli n lu shamu ai.” nga tsun dan ai re.
Danai ginra hta Myen hpyen dap daru magam zing kau ai hpang, kani nang hpam malu masha hpe wang lu wang lang jai lang wa a masha grau law jat wa nna, lagu lagut ai lam ni mung lani hte lani grau grau law jat wa ai lam, ginra Patjasan hpung ni kaw na chye lu ai.
