Indaw Ginra Mungshawa Ni Rim Hkrum
![Indaw mare shara mi hta](https://kachin.kachinnews.com/wp-content/uploads/2023/08/Indaw-Mare-shara-mi-hta.webp)
Indaw ginwang hta n dai laman, mung shawa marai 6 rim hkrum ai lam chye lu ai.
August 15 ya jahpawt, Indaw mare asak 20 daram re amyu shayi lahkawng Katha de sa nna bai n htang wa ai ten rim hkrum ai re.
Shan lahkawng hpe phone hkap jep ai shaloi, mung masa lam hte seng ai laika sumla ni hpe mu ai majaw, rim woi mat ai re lam, dai ginra na mung shawa langai KNG shiga dap de tsun dan ai re.
“Phone kaw mung masa lam hte seng na n tsen n hten na zawn re ni lawm ai, ngut na mung masa lam, majan lam ni hpe facebook hta share ai lam ni galaw ai ngu hku na rim woi mat ai ga rai nga ai.” nga tsun dan ai re.
Myen hpyen dap gaw Indaw ginwang kata jahpawt hkying 6 kaw nna shana hkying 6 daram aten du hkra, laja lana san jep ai rai nna, shana yup tung ten hta mawdaw hte hkan gawan shinggrup ai lam ni mung ding yang galaw nga ai re lam chye lu ai.
Sagaing ginra, Indaw ginwang hpe Myen hpyen dap kaw nna hpyen uphkang shara masat da nna, shana n mai pru hkawm ai tara kanu masat 144 n dau da ai re. Myen hpyen dap daru maga zing kau ai hpang, Indaw ginra mung shawa ni rim hkrum ai marai 80 daram du sai lam chye lu ai re.