Kuthkai Ginwang, Namhpakka ninghtawn, Humung mare makau na Kawngra Bum hta dung ai Myen hpyen dap ni hpe Wunpawng Mungdan Shawnglawt Hpyen dap KIA kaw nna July 18 ya shani sa htim gap gasat wa ai lam chye lu ai.
July 18 ya shana maga hkying 4 daram aten, Kuthkai Muse mawdaw lam kaba makau, Humung mare makau na Bumra Kawng hta dung ai Myen hpyen dap Hk L Y 123 hte Dapnu 88 pawng hpawm hpyen n gun 80 ram nga ai Myen hpyen dap shara hpe, KIA Dung 9 ni sa htim gap gasat ai hta, Sinat laknak machyu pala law law padang dip zing la lu ai lam, shawng lam hpyen shi sawk ni kaw na chye lu ai.
Namhpakka Myen hpyen dap Hk L Y 123 dap ni kaw nna, laknak kaba gap bun ai majaw, Namhpakka Zi Dabang lawk na mung shawa n ta hta wa hkrat hkra nna, n ta wan hkru mat ai hte mung shawa marai 3 hkala hkrum wa ai lam matut chye lu ai.
“Myen hpyen dap kawng kaw na gap dat ai laknat kaba langai Zi Dabang lawk na mung shawa nn ta de wa hkrat ai majaw, n ta wan hkru mat ai.” nga nna, Namhpakka ginra masha langai KNG shiga dap de tsun dan ai re.
Ndai mabyin hta mung shawa 2 hkala nna marai kaji langai asak si sum mat ai re. Hkala hkrum ai yan gaw, asak 48 ning Jan Gadu Hkawn Nan hte asak 15 ning kasha Naw Pa rai nga ai. Asak 9 ning re Shd Brang San Awng ni gaw dai mana jang tsi rung du ai ten hkying 9 daram hta n nga mat ai lam chye lu ai.
Ndai zawn gap gasat hkat ai lam hte seng nna lahkawng maga si hkala ai lam hpe a tsawm tup hkrak n chye lu shi ai re.
Ya ten Myen hpyen dap ni, Lashio kaw nna, Namhpakka, Namhkam maga de hpyen n gun ding yang htu shadut lung taw nga ai rai nna, lam lapran hta jahkring hkring hkap shing la gasat hkrum nga ai re.
