Mugawng mare sinpraw hkran, Woi Pu La Bum npu kaw nga ai Hk.L.Y (74) npu Myen hpyendap shara langai gasat hkrum ai hta duty zawng ai Myen hpyen la langai si nna, kaga marai langai hkala sawng ai lam ginra masha ni kaw na chye lu ai.
May 23 ya shana de hkying 5 daram aten hta Mying n chye ai la lahkawng Cycle hte sa wa nna, sa gap bun kau da ai lam ginra masha langai n dai zawn tsun dan ai re.
“Sinat n sen shi lang jan ram ngoi ai kalang ta gap kau da ai re. KIA ni shapraw ai AK-47 n sen zawn re. gap da na a ngwi sha wa mat ai. Myen hpyen ni hpa mung nlu galaw dat ai re’’ nga na tsun ai.
Dai shara gaw Hk.L.Y (74) Dap Dung ni a shara raitim, hpyen dap dung ai lam nnga sai hte Danai maga de htawtsit mat ai grai na sai re hpe chye lu ai.
Raitim, dai shara hpe kaga shara hkan na hpyen hpung ni shawnglam hkawm ai ten hta gan hkringsa nga ai shara re lam hpe matut chye lu ai.
Myen hpyendap daru magam zing la kau ai hpang, Mugawng mare kata shinggan ni hta Pyithusit hte Myen hpyen dap ni Gate ni hpe shawoi na hta grau law dung nna, gumhpraw hta sha ai lam ni hpe grau law wa ai lam mung na chye lu ai.
Bai nna, Mogawng tara rung hpe lai wa sai May 10 ya shani lata bawm hte kabai bun ai zawn, EPC myihprap wan rung hte Mugawng lahta tsang hpaji jawng ni mung lai wa sai 2022 ning laman, bawm kapaw hkrum lai wa sai re.
