Mali zup madim masing a majaw htawt sit hkrum ai Aung Min Tar mare masha ni a dum nta ni, bai gram nmai hkra hten run wa nga ai lam chye lu ai.
Miwa company SPIC lit la galaw da ya ai rai nna, 10 ning pyi nhpring shi yang, shadaw kaw nna hpri sut du hkra nbung bung yang hkrit tsang hpa poi lawm mat ai lam mare masha ni tsun dan ai re.
“ndai gaw rawng ai baw nrai sai. Gram mai tim, nmai rawng sai. Anhte mung mying hten na re nga majaw kaga masha ni hpe bai shaga madun yu yang shanhte ma hkrit ai” nga nna nta tsam hten wa ai lam hpe Aung Min Thar mare masha Jan Marip Hkawn Tawng tsun dan ai re.
Dum nta hten za ai lam ni gaw lawk 2,7,8 ni hta grau byin nna, nbung loi li sha bung yang pyi hkrit tsang ra ai lam tsun dan ai re.
Hkrit tsang ra ai majaw, asak kaba ai mare masha nkau gaw Miwa company galaw ya ai nta hta n rawng ai sha, byin mai ai hku nta kasha bai galaw jat nna, shingbyi nga ai lam chye lu ai.
Mali hka madim masing hpe 2009 e hpang nna, 2017 e shangut na yaw shada let, ginra masha ni yawng hpe Aung Min Thar hte Mali Yang mare shara 2 garan nna htawt sit shangun ai hpang, ndai dum nta ni hpe galaw ya ai re.
Mungkan madang mung shawa ninghkap ai majaw Mali zup madim masing hpe ya jahkring da ai raitim, Miwa company SPIC gaw ginra masha ni hpe zin lum ai lam matut ding yang galaw nga ai re.
Miwa a hka madim masing majaw ginra masha ni htawt sit ra ai re majaw, hten run mat sai dum nta ni hpe bai gram galaw ya na matu Miwa company hta sha lit nga ai lam ginra masha Jan Marip Lu Ra tsun ai re.
