Rawt malan hpung lahkawng: Myanmar National Democratic Alliance Army (MNDAA) (shing nrai) Kokang hte Ta’ang National Liberation Army (TNLA) (shing nrai) Palaung, “Kokang-Palaung” lapran March shata 14 ya shani majan gaw akajawng sha byin mat ai hpe maram lu nga ga ai.
Palaung ni hku nna, lawu tsang e byin ai manghkang hpe ntsa tsang hpu-awn ni hkrumzup bawngban nna hparan sa wa na re hpe she, madung myit mada nga nu ai re. Raitim, n myit mada ai sha, Kokang ni hku nna ma ja htim gasat wa nna, Palaung ni a hpyen la ni hpe rim la kau ai zawn, shagyit ni, post ni law law zing madu kau nu ai re.
Majan zim mat na matu, March 16 ya shani kaw nna bawng jahprup ai rai tim, March 20 ya shani, lahkawng maga na ningbaw kaba tsang ni Laukkai Muklum e hkrumzup bawngban ai hpang she, gap hkat jahkring na matu, myit hkrum dawdan lu mat nu ai re.
Rai tim, Kokang ni gaw, Kutkai Muklum zing madu la kau ai zawn, kaga mare kahtawng ni hpe mung, shanhte a uphkang ginra kata de masat bang la nu ai re.
Dai majaw, ndai “Kokang-Palaung Majan” kaw na, lawng lam (3) hpe sharin la mai nga ga ai.
No. 1 Sharin La Mai Ai Lam: Myit Makun (Intention)
“Kokang-Palaung Majan” kaw na, sharin la mai ai lam langai gaw, myit makun (intention) hte seng ai lam re.
Mungmasa Hpungtang Hpaji Ninghkring, University of Chicago a Professor John Mearsheimer, wa shi a laika buk: The Tragedy of Great Power Politics hta tsun da ai lam gaw, mungkan mungdan shagu ngu na daram, hpyendap lu ai. Dai hpyendap ni gaw, gasat/ninghkap lu ai n-gun shi hte shi lu ai hkrai rai nga ai. Dai n-gun ni (gashadawn: hpyen n-gun, laknak n-gun ni) hpe lu maram masam ai raitim, shanhte a myit makun ai lam ni (intentions) hpe maram masam na matu, yak nga ai hpe tsun nga ai re. Ya hkyak hkyak magam jinghku (alliance) rai yang pyi, htawm hpang e dai magam jinghku shada, n gasat wa na re ngu n lu tsun ai hpe madi madun nga ai re.
Ya ndai “Kokang-Palaung Majan” mung, Professor John Mearsheimer tsun ai lam: myit makun (intention) hte seng ai lam hpe madi madun lu ai mabyin langai rai nga ai hpe mu lu nga ai. Palaung ni myit ai lam gaw, Kokang gaw magam jinghku (Brotherhood Alliance) re majaw, shanhte hpe gasat wa na re ngu hpe n myit mada da nga ai. Dai hte maren, lawu tsang e byin ai mabyin hpe shada lahkawng maga na ningbaw ningla ni hkrumzup bawng hparan lu na re hpe she, myit da nu ai re.
Rai tim, n myit mada ai sha, Kokang ni Palaung hpe majan baw gasat ai ai lam gaw, Kokang ni a myit makun (intention) hpe n chye maram ai majaw rai nga ai.
Dai hte maren, Palaung ni hpe Wunpawng Mungdan Shanglawt Hpung (KIO) hku nna, magam jinghku (alliance) hku masat shangai dat ai raitim, hpang jahtum e tinang hpe bai hpyen tai wa ai lam gaw, Palaung ni a myit makun (intention) hpe n chye maram ai majaw rai nga ai.
Dai re ai majaw, ndai “Kokang-Palaung Majan” kaw na, hpyen wa hte kaga hpunau rawt malan hpung ni a myit makun (intentions) ni hpe maram masam lu na matu, sharin la mai nga ai.
No. 2 Sharin La Mai Ai Lam: Lamu Ga Ginra Masat
No. lahkawng ngu na sharin la mai ai lam gaw, lamu ga ginra masat ai lam rai nga ai.Kokang hpung ni gaw, Operation 1027 n hpang shi ai kaw na, Kokang amyusha ni madung shanu nga ai Laukkai Muklum kaw nna, sinna de Lashio du hkra, dingdung de Kutkai/Muse du hkra gasat zing la nna Laksan Kokang Uphkang Gaiwang (Kokang Special Region) masat la na matu, masat da ngut ai lam, chye lu ai.
Dai hte maren, Palaung hpung ni mung, Sinpraw de Namhkam-Muse-Kutkai, Sinna de Mogoke, Nawngcho du hkra, Dingdung de Mongmit-Mabein makau du hkra, Dingda de Hsipaw Muklum du hkra, Palaung uphkang mungdaw hku, masat la nna majan shang mat ai hpe maram lu nga ga ai.
Ndai zawn, tinang lu mayu ai lamu ga hpe masat la nna, majan gasat sa wa ai hta, shanhte masat da ai ginra yawng ngu na hpe zing madu la nu ai re.
Raitim, Myen ni hte gap hkat jahkring myit hkrum ai hpang, Kokang gaw, Lashio hpe bai nhtang jaw kau ai zawn, Palaung gaw, Mogoke hte Mongmit hpe bai ap kau nu ai re. De a shawng e sha, Myen gumshem dap ni gaw, Palaung ni zing madu da ai, Nawnghkio, Kyaukme hte Hsipaw ni hpe bai gasat zing madu la nu ai re.
Ya “Kokang-Palaung Majan” byin ai Kutkai hpe gaw, lahkawng yan kashun hkat nna, tinang a uphkang lamu ga hku masat na shakut hkat ai kaw na majan byin mat ai re. Ya majan byin ngut ai hpang, Kokang ni Kutkai Muklum hpe zing madu la nna, shanhte a Kukai Ginwang (District) hku masat let, Kokang Laksan Uphkang Gaiwang kata e shalawm la manu ai.
Dai re ai majaw, anhte Wunpawng amyusha ni mung, Mungmit Sinli ga (Kachin Sub-state) hpe asan sha lamu ga masat la nna, dai hpe lu hkra madu la/makawp la ra nga ga ai. Asan sha re ai lamu ga masat pandung n nga yang, gara shara kaw gasat zing madu la na n chye ai hte gara shara hpe makawp ra re hpe n chye mat na rai nga ai. Dai majaw, ndai “Kokang-Palaung Majan” kaw na lamu ga ginra masat ai lam ahkyak ai hpe sharin la mai nga ai.
No. 3 Sharin La Mai Ai Lam: Drone N-gun
No. 3 ngu na sharin la mai ai lam gaw, drone n-gun gaw, majan a mahtai hpe shapraw ya nga ai ngu ai lam re.
“Kokang-Palaung Majan” hta MNDAA ni gaw, drone n-gun hpe madung jai lang mat ai hpe mu mada lu nga ga ai. Lagaw dap n htim shi yang, drone law law hte shawng gasat nna, lagaw dap hte bai shang zing ai ladat re. MNDAA hte ni ai salang langai tsun sai, Kokang ni gaw, drone 2000 – 5000 lapran, majan gasat na jingrim (readiness) galaw da ai lam, tsun wa nga ai.
Kokang gaw, ya Palaung hte byin majan kaw sha n rai, Myen gumshem dap hte byin ai 1027 majan hta mung, drone hpe nhpaw n-ya jai lang nna, htim gasat lai wa ai hpe mu chye lu nga ga ai.
“Kokang-Palaung Majan” hta sha n rai, ya hkyak hkyak byin taw nga ai “US/Israel-Iran Majan” hta mung, Iran ni gaw madang tsaw ai “Shahed” drones hte US/Israel hpe ninghkap nga ai hpe mu mada lu nga ai.
Dai re majaw, mungkan a galai shai wa nga ai jak hpaji (technology) gaw, lagaw dap (ground troops) n-gun e mahta ai n re sha, drone n-gun hta mahta ai majan re hpe asan sha mu chye lu nga sai re.
Dai re ai majaw, Wunpawng Mungdan Shanglawt Hpyen Dap ni mung, drone n-gun hta arang bang gawgap sa wa ra sai hpe ndai “Kokang-Palaung Majan” kaw na sharin la mai nga ai.
Ginchyum hku nna, ndai “Kokang-Palaung Majan” gaw, anhte Wunpang myusha ni hpe sharin la mai ai mahkrup madup 3 hpe jaw sai re. Dai ni gaw, hpyen wa a Myit Makun (Intention) a lam, Lamu Ga Ginra Masat ra ai lam, hte Drone N-gun hta arang dat sa wa ra ai lam ni re.
Dai re ai majaw, ndai sharin la mai ai lam ni hpe seng ang ai du/gyi salang ni hku nna, sungsung lili myit let shading sharai gawgap sa wa ra nga sai ngu, ningmu tang madun dat nngai.
Ndai ningmu-laika gaw, sara Søn Rvm a ningmu sha rai nga ai.
