Wunpawng Mungdan Shanglawt Hpyendap KIA hte PDF ni hpe Mying jahten mayu ai majaw, Myitkyina nbungli pa bawm kapaw ai lam hte, Myitkyina Shatapru Laknak kaba hkrat ai lam ni galaw dan wa ai re nga, mungmasa yu maram ai ni tsun da ai re.
Ya ten Myitkyina kaw Miwa Gumsan Mungdan Myen Mung sumtsan datkasa rung lit hkam, Ma Jia nan Mali Nmai Zup Madim masing hte seng na du ang taw nga ai ten, ya na zawn da sang galaw wa ai re nga, Mung masa yu maram ai Salang langai KNG de n dai zawn tsun maram da ai re.
“Mungshawa hpe Loke Zat (လုပ်ဇာတ်ခင်း ) ai ga rai nga ai, Nbungli pa hkan shan hte shan hte galaw na, PDF hte Shanglawt ni Myo hte ni ai hkan n mai nga ai, nga jang ya na zawn mung shawa hpe dingbai dingna jaw wa ai Shim lam n nga ai, Mali Zup madim galaw wa yang mung shim lam n nga ai, dai majaw dai hpe jasan ra ai ngu ai ladat hte galaw ai lam rai nga ai,” nga tsun ai re.
February 20 ya shana hkying 8 aten daram hta gara kaw na gadai shapyen dat ai re n chye ai, Sihkam Drone langai wa hkrat kapaw ai majaw, Mandalay de rawt hkyen ai Myanmar National Airway Nbungli mai daw kaw wa hkra hten wa ai hpe chye lu ai.
Dai zawn Nbungli pa kaw Drone bawm hkrat ai hpang, Myitkyina Shatapru lawk(4) na shara lahkawng kaw wa hkrat ang ai lam chye lu ai.
Laknak kaba wa hkrat ai majaw, Mung Shawa Dum n ta hkra hten ai lam hte Mung Shawa marai lahkawng hkra hkala wa ai lam chye lu ai.
Dai hkra hkala ai Mung Shawa lahkawng gaw, Nhtoi Nnan Hpalap seng na hte makau n ta na yan re lam chye lu ai.
Ndai laman Myitkyina Muklum kata hta, Mali Nmai Zup Madim masing hte seng na hkaw tsun hpawng lamang ni galaw na matu Naypyidaw Asuya na Pyihtaungsu Wungyi Myen Hpyen Du Usa Tin Aung San hte laga hkringmang n kau, Hpaji jaw Hpawmi Nbrang Doi Bu ni Myitkyina du taw nga ai re.
Dai Pyihtaungsu hkringmang salang ni hte rau Miwa sumtsan datkasa Ma Jia mung, Myitkyina du nga ai lam rai nga ai.
Manam ni Myitkyina du nga ai ten, n dai zawn galaw ai lam gaw, Myen Hpyendap ni da sang, rawt malan hpung ni hpe mara shagun mayu na galaw ai lam re nga mung masa yu maram ai ni tsun da ai re.
Lama Myen Hpyen Dap shara hpe kapaw mayu ai rai yang, Hpyen Nbungli Pa hte Taimu n ta, hkan jahkrat na re nga, Mung masa yu maram ai Salang wa n dai zawn matut tsun maram da ai re.
“Lama na Shanglawt ni she galaw na nga yang gaw, No.1 Hpyen Nbungli Pa daru hpe galaw na rai nga ai, No.2 she galaw na nga yang, M.P.Hk rung ni, Taimu n ta ni hkan jahkrat na rai nga ai le, dai hkan Hpyen dap grai nga ai. Ya Shanglawt ni nga ai gaw, Waimaw Jamga hkran maga de nga ai she re rai. dai Nbungli pa hte M.P.Hk ni yawng hpe lai da na Mung Shawa Nbungli pa hpe sa gap ai ngu gaw, Yuk-Ti (ရုပ်တိ ) n nga ai,” nga tsun ai re.
Myitkyina Muklum kata dai ni mung laknak kaba mahku nsen ding yang matut naw ngoi taw ai lam, ginra masha ni kaw na chye lu ai.
Ndai lam hte seng na KIO Shiga magam dap lithkam Dukaba Nhpang Naw Bu hpe KNG matut san yu ai rai tim, Zuphpawng lung n rau taw shi ai nga na sha bai htang shana wa ai re.
KIA maga na gaw, Mungshawa Nbungli pa hpe sha ang na gap gasat ai lam gaw galaw na re nga, BBC Shiga hta Dukaba Naw Bu mana tsun da ai re.