Nawnglut Ginwang, Lung Tung Mare kaw Myen Hpyen dap hte Sam Hkyeng SNA dap ni pawng let, n dai laman laja lana Hpyen lahkawn ai lam galaw taw nga ai lam ginra masha ni tsun shana wa ai re.
Mani February 18 ya shani Nawnglut Ginwang kata na Jawngma n kau Monyin de San Poi htai sa htai ai jawngma n kau hpe du hkra hpyen rim lahkawn ai nga, ginra masha langai n dai zawn tsun dan wa ai re.
“Grade 5 hte Grade 10 Jawngma ni hpe sha, lai shangun ai laga ngam ai ni yawng hpe jahkring ai, nkau hpe gaw bai n htang shangun tim, n kau hpe gaw jahkring woi da ai.”nga tsun ai re.
Hpyen rim lahkawn ai lam hta, marai gade hpe rim lahkawn mat ai ngu ai lawng lam hpe gaw a tsawm tup hkrak rai n chye lu shi ai re.
Dai Hpyen rim lahkawn ai hta ginra masha ni yi sun hkauna galaw lu galaw sha ai mung shawa hpe mung n ngam, bungli madu ni hpe du hkra rim lahkawn taw ai lam matut tsun dan ai re.
Ya ten Nawng Lut Ginwang kata Myen Hpyen dap, Sam Hkyeng SNA ni hte KIA PDF pawng hpawm dap ni lapran hpyen masa shaja hkat taw nga ai majaw, Nawng Lut Ginra hta Majan laja lana byin wa na masa nga ai lam, ginra masha ni tsun maram da ai re.
