Mungmyit Sinlin Namhpakka Muklum hta Ma marai 4 gaw, Lata Bawm hta ginsup kapaw la ai majaw, Langai Si mat nna, marai 3 hkala sawng hkrum wa ai re.
February praw 3 ya shana de hkying 2 daram hta Namhpakka lawk 3, dinghku n ta lahkawng na Ma marai 4 lata bawm hta gisup ai kaw na kapaw hkra la ai majaw, langai si nna,ngam ai 3 hkala hkrum wa ai lam, ginra masha langai KNG Shiga de n dai zawn tsun dan wa ai re.
“Dai Lata Bawm gara kaw na hta wa ai ngu hpe a tsawm tup hkrak n chye lu nga ai law, dai makau hkan mung laknak lang ai ni gadai n nga ai re mi, gara kaw na sa mu tam hta wa ai kun n chye ai, n ta shawng kaw wa ginsup ai kaw na kapaw la ma ai,” nga tsun dan ai re.
Lata Bawm Kapaw la hkrum ai Ma langai gaw, hkala sawng sai hkaw law na asak si sum mat ai lam chye lu ai.
Dai Si hkala hkrum ai Ma kaji marai 4 the gaw, Miwa kasha ni hkrai re lam chye lu ai.
Dai Si hkala hkrum ai Ma ni gaw, asak 5 ning the 10 ning lapran na ma ni hkrai rai nna, lawu lahta kahpu kanau ni hkrai re lam chye lu ai.
Ya ten dai lata bawm ginsup kapaw la ai n ta makau kaw, Kokang MNDAA dap shara nga ai lam chye lu ai.
Asak si sum ai ma kaji hpe gaw, dai ni nat makoi sai rai nna, ngam ai marai 3 hpe gaw, tsi rung kaw tsi tsi hkam la taw ai lam chye lu ai.
Ndai lam hte seng na ya ten, lit nga ai ni hku na, seng ang ai ni hpe san jep taw nga ai lam chye lu ai re.
Lai was ai 2025 ning November praw 2 ya shani hta mung, Namhpakka Manau Yang mare na dum n ta langai hta mung, Laknak hkraw ai kaw na, hkraw kapaw la ai majaw, La marai 2 dai shara hta nan si sum wa ai re.
Namhpakka mare kata Myen Hpyen dap hpe KIA gasat zing kau ai hpang, Laknak ngam kapaw la ai majaw, si hkala hkrum ai lam jahkring hkring byin wa ai re.
“KIO Asuya maga na gaw, Mare kata mai byin dang di ai daram bawm seng ai lam hpe gaw galaw ngut sai rai nga ai, rai timmung dap shara the ni kahtep ai makau hkan gaw seng na matu loi li naw ngam ai, laknak ngam the seng na sadi jaw pyen dau shakap da ai lam ni gaw galaw da ai. Ya mare kaw byin ai law malawng gaw, Miwa kasha ni byin ai hkrai law malawng rai taw nga ai,” nga ginra masha langai matut tsun dan wa ai re.
Majan ten laman na laknak angaw angam bawm hkyep lam ni hte seng nna, mare kata hkaw tsun hpawng lamang ni galaw ai lam nga ai zawn, Hpaji jawng ni hkan mung ma ni hpe sharin shadum ai lam ni galaw ai lam nga ai hpe matut chye lu ai.
Namhpakka hpe KIA htim gasat zing madu kau ai lahkawng ning laman laknak ngam Bawm ni hta ginsup kapaw la ai mabyin lawng lam 6 lang nga wa sai hta, asak si sum ai marai 16 hta ma kaji marai 9 lawm ai lam KNG sawk gahkyin da ai jahpan ni hta mu lu ai re.
Mungmyit Sinli Namhpakka Muklum hpe Wunpawng Mungdan Shanglawt Hpyen dap KIA kaw na 2024 shaning nnan daw hta htim gast zing madu kau ai hpang, KIO Uphkang sairu hte sa taw ai ginra langai mung rai nga ai.
Namhpakka hta ya ten, KIA sha n ga, laga TNLA, MNDAA dap ni the rau jawm uphkang ai ginra langai mung rai nga ai re.
