Mungmyit Sinli Mungbaw Krung mayan hta, Myen Hpyen dap hpe htim shagrawt kau ai hpang, dingdung daw dap hpawm hpung ni jawm up hkang wa ai hpang, Kani Nang hpam grau grau law wa ai lam ginra masha langai KNG Shiga dap de tsun dan ai re.
Dai ginra hta, Majan rai n byin shi ai ten, Mung Shawa Patjasan ni naw mai galaw ai rai tim, 1027 Majan hpang kaw na dai ginra de laknak lang rawt malan hpung law wa ai hte rau Kani Nang Hpam grau law jat wa ai nga tsun ai re.
Kokang ni hkrai san rai uphkang ai Munggu zawn re ai ginra hta gaw, rim ahkyak la ai lam ni galaw ai rai tim, Shanglawt hte jawm uphkang ai Mungbaw krung zawn re hkan gaw, Shan hte nan dut garan jaw ai lam ni galaw taw nga ai lam Ginra masha langai KNG Shiga dap de n dai zawn tsun dan wa ai re.
“Anhte Mungbaw ga gaw, n ta shagu Kani Ya hkrai rai ma sai, n ta shagu Kani ya bai ai pyi n loi nga ai, rawt jat galu kaba wa gaw hkum tsun, grau grau she sawng wa ai, rai tim mung law Munggu zawn re Kokang ni hkrai san nga ai shara hkan bai rai jang, Kani bai n nga ai. Ya gaw, Shanglawt zawn zawn, Kokang zawn zawn, Balawng zawn zawn re ginra hkan gaw Kani Ya hkrai tup rai wa ai ga rai nga ai,” nga tsun ai re.
Dai majaw Ya ten, Mungbaw ginra hta gaw, asak ram ai ramma masha kaja ni n nga ma sai lam matut tsun dan ai re.
“Asak aprat ram na Nanghpam n lu sha ai ni gaw, Maigan mungdan ni de pru hkawm ma sai, mare kata hta gaw Kani ya hte asak kaba sai gumgai dingla ni hkrai rai mat sai,” nga Mungbaw na amyu shayi langai mung KNG Shiga de tsun dan ai re.
Lai wa sai ten, dai ginra hta Wunpawng Mungdan Shanglawt Asuya kaw na Kani Nanghpam pat jasan ai magam bungli hpe ja ja galaw wa ai rai tim, dai ginra law malawng hpe Kokang dap ni Up madu kau ai hpang kaw na, Kani Tsi Hkyep wang lu wang lang rai dut mari jai lang nga sai lam ginra masha ni tsun ai re.
Dai Ginra hta gaw, moi 2000 ning hta, Mungsa La aten gadun mi uphkang lai wa ai hpang, Kokang hte gap hkat wa ai kaw na, Myen Hpyen dap n pu Pyithutsit de gale mat ai rai nga ai.
Ya ten Dai ginra hta gaw, Kokang hte Wunpawng Mungdan Shanglawt Asuya KIO Uphkang hkrang hte sa taw ai ginra langai mung rai nga ai.