KIA Htim gasat zing madu da ai, Miwa Mung Jairit, Pang Wa muklum kata kaw Miwa Asuya Salang ni hte KIO maga na lit nga ai Salang ni hkrum jahta ai lam galaw mat ai nga ginra masha ni tsun ai re.
Miwa Asuya Salang ni hpe sa hkap tau hkalum na matu, KIO maga mare masha ni hpe shaga na chying bau shup sheng hte sa tau na hku matsun wa ai lam ginra masha langai KNG Shiga de n dai zawn tsun dan wa ai re.
Pang Wa Kaw Miwa Asuya ni sa na re nga majaw, Hpare kaw na ni hpe Chyingbau Shup Sheng madum sumpyi shaman shangun hkra rai di tau sa wa masai,” nga tsun ai re.
Ndai kalang Miwa hte KIA hkrum jahta ai lam hta, kaning re lam ni hkrum jahta ai ngu a tsawm tup hkrak n chye lu ai rai tim, Ga Sau n hprang hte seng na rai na re nga, ginra masha ni tsun maram tawn ai re.
Miwa the KIO hkrum jahta ai lam hpe lai wa sai ten hkan gaw, KIO maga sha Miwa mung de sa du jahkrum bawng ban ai rai tim, lai wa sai December Shata hta KIO Ginjaw Laiza muklum de shawng ning nan lang sa du hkrum jahta wa ai hpang, ya n dai kalang Pang Wa kaw bai hkrum jahta wa ai lam rai nga ai.
Miwa Asuya gaw, laga rawt malan hpung ni hpe Myen Hpyen dap hte gap hkat jahkring na matu dip n gun jaw ai lam galaw lu ai rai tim, KIO hpe gaw, Hpyen masa Mung masa, Sut masa lam ni hku na dip n gun jaw ai lam n lu galaw ai nga, mung masa yu maram ai ni tsun madi madun da ai re.
