Bamauk De Myen Hpyen Dap hte SNA Dap Ni Hpyen N-gun Kaba the Htim Gasat Nga
PDF masat (1) Hpyen awn rung daju kaw na woi awn htim gasat zing da ai, Bamauk muklum hpe Myen Hpyen dap maga n bungli bawm sa jahkrat bun nna, lagaw dap hte kalang bai htu shadut htim gasat taw nga ai majaw, shani shagu majan byin taw ai lam chye lu ai.
Bamauk muklum hpe n dai October Shata praw 9, 11, 13 ya shani ni hta bawm wa jahkrat bun da ai lam shawng lam hpyen magam gun langai KNG de ndai zawn tsun dan wa ai re.
“ Ndai laman Myen ni shani shagu Y12 Nbungli, Jet ni hte wa gap bun taw ai, Mani shawng shani praw 9 ya shani mung wa gap ai, Dai ni mung wa gap ai, Hummalin maga de na Tatma 33 the SNA ni pawng na bai htim gasat taw ai ga rai nga ai,” nga tsun dan wa ai re.
Mana de du hkra nbungli bawm sa jahkrat bun nga ai zawn, lagaw dap ni hku na mung laja lana htim gasat taw nga ai re.
Ndai laman Bamauk de nbungli bawm sa jahkrat ai n bungli hpan gaw, Y12 n bungli hpan rai nna, kalang sa jahkrat yang, 10 daram ram sa jahkrat bun da ai lam ginra masha ni kaw na chye lu ai.
Bamauk muklum hpe PDF pawng hpawm dap maga, September 20 ya shani htim gasat zing kau ai hpang, Myen Hpyen dap the SNA maga October praw 4 ya shani kaw na bai htim gasat wa ai mung rai nga ai.
Myen Hpyen dap the SNA maga ya na zawn laja lana htim gasat wa ai majaw, Bamauk Sinna hkran maga de na Mare kahtawng n kau hkan na mung shawa ni gaw, tinang man ang ai shara ni de hprawng yen taw nga ai re.
Ya majan byin taw nga ai shara ni gaw, Bamauk hte Deng 10 jan daram sha tsan ai kaw byin nga ai rai nna, PDF dap maga de na mung mai byin ai daram hkap shingla gasat taw nga ai re.
Dai majaw, Bamauk ginra de majan byin taw ai Shata 2 jan daram na wa sai majaw, dai ginra de na mung shawa nim alu masha yak hkak wa taw nga sai re.
Ya ten, Bamauk Indaw lam hpe laknak lang rawt malan hpung lahkawng maga na pat da ai majaw, Bamauk ginra de gun rai manu tsaw rawt ai sha n ga, malu masha n kau dumhprut wa taw nga ai re.
