Hpakant Hparakawng kaw dung ai Myen Hpyen Hpung ni Malang Dung mare maga de laknak kaba gap bun taw nga ai lam, Hpakant ginra masha ni tsun ai re.
October 13 ya shana maga de hkying 1 aten daram hta mung Hpakant Hpara kawng kaw dung nga ai Myen Hpyen hpung ni Malang Dung maga de laknak kaba gap bun ya taw ai nga, ginra masha langai KNG de n dai zawn tsun dan wa ai re.
“ Myen ni gaw Malang Dung de rap na shakut taw ai, anhte maga na ni hkap gap ai majaw, Uru Hka hpe n lu rap hkraw Nammahpyit kaw chyat taw ai majaw, n dai laman Malang Dung maga de laknak kaba shani shagu gap bun taw ai ga rai nga ai, ngut na Y12 nbungli mung shani ting ting wa du pyen gayin taw ai, dai na maga de hkying 1 Minute 15 ram hta mung ဘုရားကုန်း kaw dung ai Myen ni Malang dung de garu bun nga ma ai,” nga na tsun dan wa ai re.
Myen Hpyen Hpung ni gaw Seng Tawng maga de htim gasat na matu Seng Tawng Mare ding sa maga hku na htu taw ai Myen Hpyen hpung ni ya ten, Nammahpyit mare kaw sha naw lu du ai majaw, KIA ni nga ai shara hpe shani shana laknak kaba gap bun taw ai lam mung rai nga ai.
Ndai laman Myen Hpyen hpung ni htu gasat sa wa ai majaw, Malang Dung mare makau majan byin taw ai mung rai nga ai.
Ya ten Malang Dung mare na Hpyen yen mung shawa ni gaw, Nammahpyit Buga kaw hprawng yen taw nga ai rai nna, dai hpyen yen mung shawa ni a matu, tsi mawan malu masha garum ningtum lam ni mung ra taw nga ai re.
Malang Dung mare kaw gaw, Mawmaw Bum mare masha ni sa hprawng yen taw ai buga hpung rai nna, n dai laman majan bai byin wa ai majaw, Mawmaw Bum hpyen yen mung shawa ni hte Malang dung mare masha ni gaw, ya ten, Nammahpyi buga nawku jawng wang hta sa du hprawng yen taw nga ai rai nga ai re.
Malang Dung mare makau kaw, Mani shawng shani gap gasat hkat ai hta, Myen HPyen dap maga si hkala law nna, si taw ai moi mang ni hpe dai ni du hkra rai n sa hta la ai lam chye lu ai.
Malang dung maga de htim gasat taw nga ai ni gaw, Myen Hpyen dap the SNA Pyithutsit dap ni rai nna, Mani shawng shani na majan hta Pyithutsit maga na Siniper lang ai Hpyenla langai hpe mung jahkrung lu rim da ai lam, shawng lam hpyen magam gun the ni nawn ai ni tsun ai re.
Myen Hpyen dap maga sum machyi law ai majaw, dai ni hkan gaw, laknak kaba gap bun ai hta lai nna, majan byin ai lam gaw, laga mi n nga ai lam chye lu ai.
