Manmaw Majan hta Myen Hpyen dap maga na, Mana Yuptung ten Nbungli 2 hte wa gap bun kau da nna, dai hpawt maga mung nbungli 2 hte bai wa gap gasat ai hpang lagaw dap ni htu lung wa ai majaw, Majan laja lana gap gasat hkat wa ai nga, shawng lam hpyen magam gun ni tsun ai re.
Myen Hpyen dap nbungli bawm wa jahkrat bun ai hpang, Myen ni bai shamu wa ai majaw, Manmaw Myo kata kaw lahkawng maga gap gasat hkat ai lam ni byin taw ai lam, shawng lam hpyen magam gun langai KNG Shiga de n dai zawn tsun dan wa ai re.
“Ndai laman gaw loi gan zim taw ai, Mana yuptung kaw nbungli 2 hte sa gap kau da nna, dai hpawt mung bai sa gap ma ai, Myo kata kaw re, Myen ni bai htu lung wa ai majaw, lahkawng maga gasat hkat taw ai ga rai nga ai,” nga tsun dan ai.
Lai wa sai bat, Ts.K.Hk 21 makau grup yin na dap dung ni hpe Myen hpyen dap ni htim gasat zing madu kau ai hpang, n dai lahkawng masum ya majan gan zim taw nga ai kaw na, Myen Hpyen dap ni mana kaw na nbungli hte bai sa gap gasat wa ai hpang kaw na, dai ni gaw lagaw lam hku na mung bai htim gasat wa ai majaw, Manau wang, Golf Pa makau grup yin ni hta gap gasat hkat taw nga ai lam chye lu ai.
KIA hte Pawng hpawm dap maga na mung, Manmaw hpe n lu n mai htim gasat na masing hkyen taw ai zawn, Myen hpyen dap maga na mung Manmaw hpe yawng bai gasat zing madu la lu hkra shakut taw nga ai lam mung rai nga ai.
Manmaw ginra de Myen Hpyen Hka Sanghpawli hku na, Laknak machyu pala hte Hpyen n gun ni bai htaw shadu lu ai hpang kaw na, Myen ni hpyen man 7 hku bai htim gasat wa ai majaw, KIA pawng hpawm dap ni zing da ai dap dung shara 4 hpe bai gan yen kau ra mat ai lam mung rai nga ai.
Ya ten Manmaw hta HPyen masa matut shaja hkat taw nga ding yang rai nna, Myen Hpyen dap maga na gaw, Nbungli Drone ni hte shani shana gap gasat taw nga ai re.
