Hpakant Myen Hpyen Byuha kawng na gap dat ai laknak kaba langai Mashi Kahtawng Manap gat makau na Rahkaing Kung, kaw wa hkrat bun wa ai hpang, ginra masha n kau Myitkyina de hprawng yen ai lam ni nga taw sai re.
Dai hpawt hkying 4 chyen daram kaw, Hpakant Myen Hpyen Byuha kawng na gap dat ai laknak kaba si langai, Mashi Kahtawng shingdu, Rahkaing Kung kaw wa hkrat ang ai lam chye lu ai.
Laknak kaba wa hkrat ai hta mung shawa si hkala lam gaw n nga tim, Mung shawa yawng hkrit kajawng ai lam ni byin wa ai majaw, ginra masha n kau dai hpawt myi mu wa ai hte rau Myitkyina de hprawng yen sai lam Mashi Kahtawng ginra masha langai KNG shiga dap de tsun dan wa ai re.
“ Dai hpawt maga, Hkying 4, hkying 5 ten daram Byuha kawng na gap dat ai ngu maram lu ai laknak kaba langai anhte Mashi Kahtawng Manap gat makau, Rahkaing Kung ngu ai shara kaw wa hkrat ai, masha si hkala ai lam chyawm hpa n nga ai, laknak kawa hkrat wa ai majaw, Mashi kahtawng mare masha n kau gaw, myit tsang wa ai ga rai nga ai, dai hpawt kaw na gaw, Nawku Hpung Mawdaw n kau the rai na Myitkyina de hprawng yen hpang sai ga rai nga ai,” nga tsun dan ai re.
Hpakant Mashi Kahtawng na hprawng yen yu wa ai mung mare masha 40 jan gaw, Myitkyina Chang Mu buga de wa du hprawng shingbyi na lam sagawn chye lu ai re.
Dai na maga de hkying lahkawng aten daram hta mung, Hpakant Byuha kawng na gap dat ai laknak kaba si lahkawng Mashi Kahtawng Kyuhpyi bum kaw wa hkrat ai lam nga ai hpe matut chye lu ai.
Ya ten Myen Hpyen dap ni gaw, Seng Tawng mare maga de htim gasat na matu, San Chyoi, Rahkaing Kung shara ni hpe laknak kaba gap bun taw nga ai mung rai nga ai.
Myen Hpyen dap maga na gaw, Hpakant ginra de, Hpyen n gun jat taw nga ding yang rai nna, dai ni mung, Nam Ya kaw na Myen Hpyen Mawdaw kaba 5 Hpakant de lai lung wa sai lam ginra masha ni tsun ai re.
Myen Hpyen dap ni gaw, ya ten Hpakant ginra hpe Hpyen man 3 hku htu shadut htim gasat taw nga ai rai nna, dai ning laman Hpakant ginra hpe gasat zing la lu hkra galaw nna, Ra lata poi galaw na matu shakut taw nga ai masa re lam, Hpyen masa yu maram ai ni tsun tawn ai re.
