Bamauk Ginra Majan Laja nga
Indaw Bamauk Mawdaw lam kaba hpe Indaw PDF Dap maga pat da
Jinghpaw Mung Sagaing Jarit, Bamauk ginra hta, majan laja lana byin taw ai lam ginra daju PDF lit nga ai ni kaw na chye lu ai.
Bamauk ginra hta Sam Hkyeng SNA hte Myen ni pawng nna, PDF KIA ni hte September 15 ya shani kaw na majan byin taw ai lam chye lu ai.
“Sam Hkyeng SNA Hpyen n-gun grai law ai. Dai shan the a ginra gaw, Myen Hpyen dap dapnu 77 n pu kaw sha rai nga ai. Bamauk mare n tsa kaw nan byin taw ai ga rai nga ai, Myo kata de gaw rai n du shi sam ai, Myo makau grup yin kaw byin taw ai ga rai nga ai, Mani kaw na Majan byin hpang ai, Nbungli the gaw lahkawng lang wa gap sai,” nga shawng lam hpyen magam gun nit sun ai re.
Mani kaw na Indaw PDF dap maga na, Indaw Bamauk Mawdaw lam kaba hpe tsep kawp pat kau sai lam n dau wa ai re.
Maga mi de Sam Hkyeng SNA hte Myen Hpyen dap maga na mung, Bamauk ginra masha ni hpe Mare kata kaw na Mare shinggan de n pru shangun ai lam ni galaw taw nga ai lam, shiga ni mung pru taw ai re.
“Majan byin taw nga ai, Bamauk mare kata na mung shawa ni hpe shinggan n lu shangun ai sha pat da ai ga rai nga ai, Lam ni yawng pat da ai da, Myo kata kaw na shinggan de n le shangun ai ga rai nga ai. Lam hkan jep taw ai gaw, Sam Hkyeng SNA ni re,” nga ginra masha the ni nawn ai mung shawa langai matut tsun dan da ai re.
Indaw PDF na lit nga ai ni mung, Majan byin taw ai lam gaw teng ai rai tim, Mung shawa ni hpe hpyen ninggan shatai sharawng da ai lam the seng na gaw, a tsawm tup hkrak rai n lu tsun dan ai lam matut tsun ai re.
Ya byin nga ai majan hta, Mung shawa si hkala lam ni mung nga ai zawn, lahkawng maga na si hkala lam ni mung nga taw ai lam chye lu ai.
Bamauk ginwang gaw, Sam Hkyeng SNA dap ni n gun ja ai ginra rai nna, ya ten, Bamauk ginra a dingdung maga ginra law malawng hpe SNA ni up madu da ai re.
Bamauk ginra Sinpraw the Sinna maga ginra law malawng hpe KIA woi awn ai PDF dap ni up madu da ai zawn, maga mi de hpyen masa lam ni mung shaja hkat taw nga ai re.
