Sam Hkyeng hte Jinghpaw Amyusha ni a Mayak lam hte seng na Myitkyina kaw hkrum Bawngban
Mung Nyang Ginwang Nawng Lut Ginra hta byin nga ai Sam Hkyeng Hpyen Dap mag ana Jinghpaw Mung Shawa marai 14 sat kau nna, Laiwa laisa Jinghpaw Mung Shawa ni hpe Jahkrit Shama dawsa ai mabyin manghkang lam ni the seng nna, Rudi Sam amyusha ni the Jinghpaw Wunpawng Amyusha ni hkrum jahta bawngban hpawng lamang hpe Myitkyina kaw galaw wa ai lam chye lu ai.
Dai Hkrum jahta bawngban hpawng lamang hpe August 11 ya shani Myitkyina Agape Hotel hta galaw wa ai rai nna, Dai hpawng lamaang hta PCG, Jinghpaw Mung Bawsang Hkringmang (လူမှုရေးဝန်ကြီး) hte Sam Hkyeng htunghking hpung, Sam htunghking hpung ni WMR, Makam Masham Hpung Ningbaw ni CSO ni sa du shang lawm bawngban lawm ai hpe chye lu ai.
Dai hpawng lamang hta Ndai laman hkyak hkyak byin nga ai Indaw Gyi ginra hta byin nga ai Sam Hkyeng SNA dap ni kaw na Jinghpaw amyu sha ni hpe mara kata majoi sat shamyit taw nga ai lam the seng nna, Hkrum jahta wa ai hta, rau nga rau pra myusha ni, Jinghpaw Mung Ginra hta Myit hkrum let gara hku rau jawm nga pra na ngu ai masa lam ni hpe bawng ban wa ai lam dai zup hpawng hta sa du shang lawm ai Salang langai KNG shiga dap de tsun dan wa ai re.
“Madung gaw, Ya yang Indawgyi Nawng Lut ginra kaw byin nga ai လူမျိုးရေး ပဋိပက္ခ the seng nna, jahkrup bawngban ai re ngu mu mada ai law, hpang ai dai zawn လူမျိုးရေး n byin hkra gara hku na rau jawm nga pra sa wa na ngu ai lam ni hpe bawngban mat ai ga rai nga ai,” nga tsun dan ai re.
Ndai hpawng lamang galaw ai yaw shada lam gaw, Jinghpaw Mung hta nga ai ginra madu Sam amyusha bawsang ni hte Jinghpaw amyusha shada lapran byin hkrum hkra nga ai, mayak manghkang lam ni hpe hparan sa wa lu nna, shada grau nna, mahku mara hkat let rau jawm nga pra sa wa lu na lam hpe yaw shada ai the n dai lamang hpe galaw wa ai re lam, dai hpawng lamang hpe woi awn galaw ai, PCG Salang Lamai Gum Ja hkalum ga hta tsun mat wa ai re.
Sam Hkyeng SNA dap ni kaw na lai wa sai July 15 ya shani kaw na Nawng Lut Ginra, Mai Nawng the Mamung Kai mare ni the htim gasat zing madu kau ma ai hpang, Jinghpaw amyu shamyit masing hku nna, mara kata mung shawa ni hpe rim zingri sat nat ai lam ni galaw wa ai lam dai ginra na mung shawa langai KNG shiga dap de tsun dan wa ai re.
Sam Hkyeng SNA dap ni July 15 ya hpang kaw na, dai ni du hkra rai yang, Jinghpaw amyu masha marai 14 hpe mara kata gap sat kau nna, lai sa lai wa mung mare masha hta, Jinghpaw re ai ni hpe mawdaw n tsa na gang garawt shaw la nna, lam amyu myu hku jep zingri lai wa sai re.
Monyin muklum kata na Sam Hkyeng Htunghking Salang the Kahtawlik Nawku hpung na Hpung Sara yan gap sat hkrum wa ai hpang mung, PCG lapran Sanglang tai ya ai hte Sam amyusha Ningbaw Ningla ni the Jinghpaw amyu htunghking salang ni Myitkyina kaw hkrum jahta bawngban wa ai hpang, amyu sha shada prinem lam hpe lu la wa ai hpang, lai wa sai shara kaw na kalang bai amyu sha mang hkang lam ni bai byin wa ai lam rai nga ai
