Seng Tawng KBC Nawku Jawng Wang Kaw Laknak Kaba Si wa hkrat ang ai majaw, Mung Shawa 1 si 5 Hkala

Hpakant Myen Hpyen  Byuha kawng kaw na gap dat ai laknak kaba si Seng Tawng KBC Nawku jawng wang kaw wa hkrat ang ai majaw, Mung Shawa marai 1 si nna, mara 5 hkala hkrum wa ai lam chye lu ai.

Mana August praw 7 ya shana Hkying 9 jan aten hta, Hpakant Myen Hpyen Byuha kawng kaw na gap dat ai laknak kaba si Seng Tawng Mare Kyuhpyi bum makau KBC Nawku Jawng wang kaw wa hkrat bun ai majaw Seng Tawng Mare na Asak 60 ning ram re ai Jan Bawm Sam Asak si hkrum wa nna, laga dum n ta masha marai  5 mung hkala sawng wa ai re.

Ndai laman Hpaknt kaw majan laja lana gap gasat hkat ai lam gaw n nga tim, Myen hpyen dap maga ya na zawn laknak kaba hkrup mara ding yang gap shadam bun taw nga ai  lam, Ginra masha langai KNG de n dai zawn matut tsun dan wa ai re.

“Grai wa laja lana gap hkat ai lam gaw n nga ai, rai timung Myen Hpyen dap maga na shana du wa jang laknak kaba gap shapraw praw re ai, ndai laman shana shagu ngu na hkrup ai de gap bun taw nga ai. Ndai laman nga yang, Mung shawa ni nga ai mare de da sang sha ang na gap bun taw nga ai, Mana gap bun ai mung Seng Tawng Buga Hkalup HPung Nawku jawng wang kaw wa hkrat ai majaw, masha si hkala hkrum wa ai re,” nga tsun dan ai.

Dai Hkala Sawng ai marai 5 gaw, 1. Shy Ja Seng Roi Ing, 2. Jan Lashi Doi Ling, 3, Shd. Mung Lat Naw, 4. Shd, Gyung Lum, 5. Shy Ja Seng Htoi Nu Pan ni re lam chye lu ai.

Ya ten Dai hkala sawng ai mung shawa marai 5 hpe Mawshan Mung Shawa tsi rung hta tsi tsi hkam la taw nga ai lam matut chye lu ai.

Ndai laman Myen Hpyen dap hte KIA dap lapran hpyen masa ding yang matut shaja hkat taw nga ai rai nna, Sharaw Hka mare maga de shani shagu gap gasat hkat taw nga nna, Laknak kaba ni ding yang ngoi taw ai lam chye lu ai.

Sharaw hka mare maga de Myen Hpyen dap laknak kaba nau gap bang ai majaw, dai mare na hpyen yen mung shawa ni yawng, Myitkyina Shatapru lawk de hprawng yen taw nga sai re.

Ya matut nna mung Myen HPyen dap maga na Seng Tawng mare maga de Hpyen man yawng wa taw nga ai majaw, Mung shawa ni nga ai mare ni hta majan matut laja wa na masa nga ai majaw, Hpakant ginra masha myit tsang taw nga ai re.