Hpakant de htu lung wa ai Myen Hpyen Hpung ni Lay Pyin Bawm Yam Dap kaw Du Shang Sai
Kamaing kaw na Hpakant lam ding yang htu lung wa ai Myen hpyen hpung ni Mana kaw na, Lung Hkang mare Bawm Yam dap de du shang bang nga sai lam, shawng lam hpyen magam gun hte ni nawn ai ni tsun ai re.
Hpakant lam de htu lung wa ai Myen hpyen hpung ni gaw, Shata lahkawng hkawt masha arang dat let, Hpakant lam yawng hpe bai htim gasat wa ai mung rai nga ai.
Lai wa sai April Shata kaw na htu lung wa ai Myen hpyen hpung ni mana Lung Hkang Bawm Yam dap de du shang wa ai masa lam the seng na, shawng lam hpyen magam gun the ni nawn ai Salang Langai KNG de n dai zawn tsun ai re.
“Myen ni gaw Mana hkying 9 aten ram kaw na Lung Hkang Sha It Yang Bawm Yam Dap (လယ်ပြင် ရမ်းချက်စက်ရုံ) de shang taw sai, Ya gaw yawng du shatup sai. Mana gaw Mazup Yang Htawng kaba de mung Mawdaw kaba 6 hte hpyen n gun hpring hpring rai shang mat wa ai,” nga tsun dan mat ai re.
Myen ni gaw mana kaw na Hpakant num shang Le Pyin Bawm Yam dap de shang shara la nga sai majaw, n dai laman Lung Hkang Makau grup yin kaw laja lana gap gasat hkat wa na masa nga ai lam tsun maram tawn ai re.
Dai Myen hpyen hpung ni Nam Ting du ai hpang, Hpakant hte Gin Si maga de na hpyen hpung ni yu wa na lam daw mi kaw na sa gasat garum tau la wa ai lam chye lu ai.
Hpakant Lung Hkang makau grup yin de du wa ai ten Myen hpyen hpung ni hpyen man masum hku na shang wa ai re lam chye lu ai.
Myen hpyen hpung ni shang wa ai hpyen man masum gaw, Nam Yum, Nam Jan Lam, Hpan Hka Saung the Lay Pin mawdaw lam kaba ding yang ni hku na htu kanaw shang wa ai re lam chye lu ai.
Dai hpyen hpung ni gaw ya ten Lung Hkang Bawm Yam dap hta shang shara la nga nna, Hpakant Byuha Kawng de du wa ai lam gaw rai n nga shi ai re.
Ndai laman Bawm Yam dap kaw na Myen hpyen hpung ni Hpakant Byuha kawng de lung wa ai rai yang, Lung Hkang Mare makau grup yin ni hta laja lana gap gasat hkat wa na masa nga ai lam ginra masha ni tsun maram da ai re.
