Manmaw Pauk Kung lawk Kathawlik Sara Daw Ginwang Rung San Patrick Nawku Jawng kaba hpe Myen hpyen dap ni wan sa nat jahten kau ya ai lam ginra masha ni kaw na chye lu ai.
March 16 ya shana de hkying 4 ram hta Manmaw စုပေါင်း Rung kaw rawng nga ai Myen hpyen dap ni pru wa na sa nat jahten kau ya ai re nga tsun ai.
Manmaw Sara Daw Ginwang rung hpe Myen hpyen dap ni February 23, 26 ya shani kaw na Manmaw masat lahkawng lahta tsang jawng hte Jau nta, Ma Ma nta ni yawng hpe nat jahten kau ma nna, ya hpang jahtum ngam ai Nawku jawng kaba hpe mana de hkying 4 ten hta Manmaw စုပေါင်း rung hta rawng nga ai Myen hpyen dap ni pru wa na, sa nat jahten kau da ya ai re nga, Manmaw hpyen man shawng lam hta du nga ai magam gun ni tsun ai re.
“Manmaw Kahtawlik nawku jawng wang hpe nat ai gaw ya hte na mi rai sai, ya hte shata kaw gaw, အထက (၂) jawng hte Jau nta, Ma Ma nta ni hpe shawng nat jahten ai rai nga ai, mana de gaw, dai Nawku jawng sha ngam sai hpe bai sa nat jahten da ai ga rai nga ai.” nga tsun ai re.
Myen ni nat jahten kau ya ai San Patrick Nawku jawng gaw, Manmaw mare hta kaba dik nawku jawng langai rai nna, Sara daw Ginwang na nawku jawng kaba langai mung rai nga ai.
Dai Nawku jawng kaba hpe 1958 ning hta gaw gap da ai, Nawku htingnu kaba langai rai nna, shaning 70 ning ram na sai nawku jawng re.
Jinghpaw mung hta Kahtawlik Sara Daw ginwang lahkawng nga ai hta, langai gaw Myitkyina Sara Daw Ginwang, hte lahkawng Manmaw Saradaw Ginwang rai nga ai.
Ya na zawn Manmaw San Pactrick Nawku Jawng Wang nat jahten kau hkrum ai hte seng nna, Kahtawlik hpung masha ni yawng myit n pyaw ai lam, RVA Facebook hta tsun da ai hpe mu lu ai.
