Mungmyit Sinli, Mung Ji Ninghtawn, Ping Hkam mare hta Ja htu sha nga ai Kokang MNDAA ni hpe sa ning hkap ai, mung mare masha ni hpe Kokang MNDAA dap ni sinat gap bun ai majaw, mung shawa marai 6 si nna, marai 6 hkala sawng hkrum wa ai re lam chye lu ai.
Mung Ji Ping Hkam Mare hta mung shawa ni ninghkap nga ai lapran, Kokang MNDAA dap ni Ja htu sha taw nga ai majaw, dai ni March praw 5 ya shana maga hkying 2 ram hta mung shawa ni sa ninghkap ai hpe Kokang MNDAA hpyen la ni ya na zawn gap sat wa ai re nga, dai ginra na mung shawa langai KNG shiga de n dai zawn tsun dan wa ai re.
“Mung Shawa ni a Hkau Na kaw Ja htu sha nga ai majaw, lang the lang ninghkap ai, n madat ya ai, n madat ya ai majaw ntsa tsang de mung laika the shawk shawn sai hpa n lak lai ai, dai hku matut htu sha nga ai majaw, dai ni bai sa ning hkap ai, dai kaw shada tsun shawng shai ga law hkat ai, ga law hkat wa ai kaw na MNDAA ni sinat the gap bun wa ai, dai kaw nan marai 6 si na, marai 6 hkala hkrum wa ai ga rai nga ai.” Nga tsun dan wa ai re.
Mung Ji kaw na Seng Ke hte Minute 45 ram sa yang du ai Ping Hkam mare na mung shawa Hkau na lamu ga hta ja htu sha nga ai hpe lang hte lang sa ning hkap ai rai tim, jahkring ya ai lam n nga dai hku matut htu sha nga ai hpe sa ninghkap ai mung shawa ni ya na zawn gap sat hkrum wa ai rai nga ai.
Ndai lam hte seng na ginra masha ni n tsa tsang de de hkra shawk shawn sai rai tim, madat ya ai lam n nga, mung shawa ni a hkau na lamu ga hta ja htu sha ya taw ai mung rai nga ai.
Kokang dap ni sinat gap bun ai majaw asak si hkrum ai La marai 6 hta KIA magam gun marai 2 mung lawm ai rai nna, hkala ai marai 6 mung yawng la ni hkrai re hpe chye lu ai.
Kokang MNDAA dap ni maga na ya na zawn mung shawa ni hpe gap sat ai majaw, dai ginra na mung shawa ni yawng shan hte gap sat da ai moi mang hte rau rai na, Mungji mare na Kokang rung hta n gun madun taw ai lam ndai zawn matut tsun dan ai re.
“MNDAA hpe n ra sharawng ai lam n’gun madun nga ga ai, anhte mung shawa ni galaw lu galaw sha nga ai hkau na lamu ga hpe MNDAA ni ja sa htu nna, ya na zawn manghkang byin ai re. ndai zawn re lam hpe tsep kawp n ra sharawng ga ai, ndai zawn mung shawa hpe n makawp maga ai sha n ga, mung shawa ni hpe roi rip dip sha na matu shang wa ai MNDAA hpe tsep kawp n ra ga ai, ndai mahtai kaja pru hkra shakut mat wa na re,” nga matut tsun da ai re.
Kokang MNDAA a ya na zawn galaw ai masa lam a n tsa, mung shawa ni myit n gut, jawm ninghkap taw nga ma ai re.
Mungji ginra gaw, Kokang MNDAA the KIA dap lahkawng yan shamu shamawt ai ginra rai nna, lamu ga mang hkang lam ni jahkring hkring byin ai shara ni mung rai nga ai.
Mungji ginra gaw, Kutkai Sinpraw maga Ta Mungnye ginra ni hte matut ai shara rai nga ai.
