Myen Hpyen nbungli hte Myitkyina Tanghpre mare lahta Woi Shayi mare de dai na maga nbungli hte wa gap bun ai nga, dai ginra na mung shawa ni kaw na chye lu ai.
Ndai laman Myen hpyen dap ni Tanghpre mare de hpyen shamu shamawt nga ai hta, dai na maga Woi Shayi mare kaw nbungli bawm wa jahkrat bun ai majaw mung shawa langai si hkala hkrum wa ai nga dai ginra na mung shawa langai KNG de tsun dan wa ai re.
“Dai ni shani ka-ang hta kalang, dai na jan du ai hpang hta mung kalang wa gap bun ai, masum mali lang re ga rai nga ai, dai ni wa jahkrat ai kaw marai langai hkra ai, dai ram sha chye ai,” nga tsun ai re.
Myen hpyen dap nbungli hte dai na maga hkying 1 ram hta kalang, dai na de n sin sin wa yang kalang wa jahkrat kau da ai re.
Dai nbungli bawm wa jahkrat ai hta mung shawa langai Si hkrum wa ai re.
Woi Shayi mare gaw Tanghpre mare the Deng 5 daram sha tsan ai mare rai nna, Gwi Htau hte Nsawp lapran na mare kaji langai rai nna, dai shara hta lai sa lai wa ni shat sha hkring sa sa re shara mung rai nga ai.
Myen hpyen dap maga n dai laman Tanghpre mare makau grup yin hta hpyen shamu shamawt ai lam galaw nga nna, KIA dap maga na sa htim gap gasat ai lam n nga tim, shan the maga na tau hkrau shim lam la ai hku na nbungli the sa gap bun wa ai re nga ginra masha ni tsun maram nga ai re.
Myen hpyen dap ni n dai laman Myitkyina kaw na Tang Hpre mare de hpyen n’gun ding yang sa taw nga nna, mana February 2 ya shana hta mung Lamung Zup mare makau grup yin de laknak kaba gap shadam bun wa ai re.
Myen hpyen dap maga de na ya na zawn hpyen shamu shamawt lam galaw nga ai gaw, Myitkyina mare kaba hpe makawp lu na matu Nhkai Bum de Byuha dap kaba langai dung na matu hkyen nga ai masa re nga, hpyen masa yu maram ai ni tsun tawn ai re.
Tanghpre mare lahta yawng hpe KIA htim gasat zing madu da sai re.
