Manmaw hte Manje mare kaba ni hta majan laja lana matut gap gasat hkat nga
Manmaw the Manje mare kaba ni hpe KIA htim gasat wa ai ya shata mi hkawt du wa ai ten du hkra laja lana matut gap gasat hkat taw nga ai lam shawng lam hpyen shi sawk ni kaw na chye lu ai.
Ya ten Manmaw majan hta Myen hpyen dap maga na sum machyi ai lam ni law taw nna, n kau asum jaw, dawng hkawn hpraw sharawt na rim hkam ai lam ni mung shani shagu nga taw ai lam, shawng lam magam gun hte ni nawn ai ni kaw na chye lu ai.
Manmaw Myen hpyen dap Hk.L.Y 47 dap shara hte Ts K Hk 21 dap shara ni hpe wang da sai rai nna, Myen hpyen dap maga na pru lam n nga mat ai majaw, nbungli the shani shagu wa gap garum taw ai lam chye lu ai.
“Ya gaw Manmaw Myen hpyen dap ni hpe KIA the pawng hpawm dap ni yawng wang da sai masa re ga rai nga ai, Myen ni gaw pru mung n mai mat ai re nga yang, shawng de mung n mai, hpang de mung n mai mat re majaw, shani shagu nbungli hpyi na sa gap garum taw ai ga rai nga ai,” nga shawng lam magam gun the ni nawn ai salang langai KNG de tsun dan wa ai re.
Myen hpyen dap maga na nbungli the shani shagu wa gap gasat nga ai majaw, Manmaw mare kata na mung shawa dum n ta law law hten hkrum taw sai hpe chye lu ai.
Manmaw mare kaba na Ts K Hk 21 dap shara hpe wang da ai masa hta, Deng 4 maga de na Myen hpyen hpung ni mung asum jaw laknak jahkrat mat nna, Shwegu maga de na Myen hpyen dap ni mung, shingla majan a matu sha hkyen shajin taw sai majaw, Manmaw kata rawng nga ai Myen hpyen dap ni hpa n mai galaw sai nga nna, hpyen masa yu maram ai ni tsun tsun tawn ai re.
Manmaw hte Manje mare ni hpe KIA hte JInghku rawt malan dap ni pawng hpawm htim gasat taw nga ai hta, Myen hpyen dap maga sum machyi lam ni law taw ai majaw, nbungli hte shani shagu wa gap gasat taw nga ai re.
Manmaw htim shagrawt majan hta majan matut nan aw laja na masa nga ai lam hpyen masa mung masa yu maram taw nga ai salang langai KNG de n dai zawn matut tsun da ai re.
“Manmaw hpe lu na gaw loi naw yak na re, ya hte Manmaw Dakkasu jawng hpe moi yap raw 9 ya shani gau shale kau lu nna, 20 ya shani Myen ni bai lu zing kau ai, dai majaw ya dai jawng kata hkan Myen ni grai rawng jawng ai, anhte na Drone ni gaw, bungli masan n sa mat n mai pyen mat, lagaw lam the htu ngu yang gaw, si hkala ai grai law, tsawm ra gaw n loi ai,” nga nna matut tsun ai re.
Manmaw Manje mare ni hpe December praw 4 ya jahpawt kaw na htim gasat hpang wa ai ya shata mi hkawt du wa nga sai re.
