Loi Je Miwa gunrai hpaga ginlen chyinghka kaba hpe mani December 16 ya shani lahkawng maga hpaw dat sai lam chye lu ai.
Ya ten dai loi je jarit chyinghka kaba lam hku na Myen mung maga de na langu si hte ginshau si mawdaw ni sha naw lai bang ai rai nna, laga gunrai htaw ginlen bang ai lam gaw hpa rai n mu shi ai nga Loi Je ginra masha langai KNG shiga dap de tsun dan wa ai re.
“Chyinghka gaw hpaw sai le, langu hte ginshau si gaw shalai sai, arung arai gaw laga hpa shalai ai rai n mu shi ai, miwa maga de na laga rai hpa shang ai lam mung rai n nga shi ai,” nga tsun dan wa ai re.
KIO ginjaw Salang ni hte Miwa madang tsaw datkasa Salang wa hte hkrum jahta ngut ai hpang, Jarit chyinghka ni yawng bai hpaw sai lam Dukaba Naw Bu tsun ai rai tim, tara shang pru shang hkra rai na hpaw ai lam n nga ai sha, KIO maga de chyinghka hpaw ai madang sha byin wa ai re.
Miwa Salang hte hkrum jahta ngut ai hpang, jarit chyinghka hpaw na lam myit hkrum lam lu wa ai rai tim galoi kaw na gara hku na tara shang hpaw sa wa na ngu ai hpe tup hkrak n chye lu ai ten hta ya na zawn Loi Je jarit chyinghka hpaw wa ai mung rai nga ai.
Ndai kalang na zuphpawng ngut ai hpang, jarit chyinghka yawng bai hpaw na matu myit hkrum lam lu wa ai rai tim, masha hte jak sau shalai na lam hte seng nna, Myen hpyen dap hte naw matut bawng ban ra ai nga Miwa maga tsun ai hpe sagawn chye lu ai.
“Ya lama jarit chyinghka hpaw ai nga tim, masha hte jak sau ni gaw n mai shalai shi ai, laga masha lang gun rai ni hpe sha naw shalai shangun ai,” nga nna, KIO hte ni nawn ai salang langai KNG de matut tsun dan wa ai re.
Ya ten Loi Je jarit mayan hta lang nga ai gunrai ni yawng gaw, tara n shang ai lam hku na lagu shalai ai gunrai ni re majaw, gunrai manu matut naw laja taw nga ai lam chye lu ai.
Loi Je mare hta lai wa sai ten gunrai manu ni hpe ramdaw hte lu mari sha taw ai rai tim, ndai jarit chyinghka pat kau ai hpang tara n shang ai lam hku na shalai ai gunrai ni hpe manu jahpu hpu hpu hte mari sha ra taw ai nga matut tsun dan wa ai re.
“Loi Je hte jarit mayan kaw gaw tara shang lam kaba hku n shang tim, laga tara n shang ai မှောင်ခို lam hku na grai shang ai, dai hpe mari sha taw ai rai nga ai, lama tara shang chyinghka kaba hpaw yang gaw gunrai manu ni gaw she n yawm na i?” nga Loi Je ginra masha langai KNG de tsun dan wa ai re.
