Zahkung Ting Ying Majan sum ai hpang, Miwa mung Hting Chung nta nga taw ai kaw na Myen hpyen dap daju Naypyidaw de sa kau ai lam Myen hpyen Telegram Shiga ni hta mu lu ai re.
Zahkung Ting Ying Naypyidaw du ai hpang, jarit shim lam ningtau hkringmang Myen hpyen Dukaba Tun Tun Nawng sa du hkrum ai sumla ni hte hpawn rai Telegram hta mu lu wa ai rai nga ai.
Dai sa du hkrum shaga ai hta madung hpa hte seng na hkrum shaga ai re ngu hpe a tsawm tup hkrak n chye lu ai re.
Jinghpaw mung, laksan masat ginra (1) ngu shamying tawn ai Chihpwi, Saw Law, Pang Wa, Kanpaiti, Phimaw yawng hpe tat sum kau ai hpang, Miwa mung hting chung nta kaw wa nga taw ai ten, ya na zawn Naypyidaw de sa kau hkrum ai lam mung rai nga ai.
Myen hpyen dap masat ya ai Jinghpaw mung laksan masat (1) ginra ngu ai mying hpe Wunpawng Mungdan Shanglawt hpung KIO ginjaw kaw nna, November 28 ya shani dawm shaprai kau sai lam n dau laika shapraw wa ai hpang ya ten dai ginra yawng hta KIO Uphkang Sairu hkrang hte sa taw sai mung rai nga ai.
