Kanpaiti hta Miwa langu mawdaw kaba ni ding yang pru shang lam galaw nga nna, Miwa maga na gunrai tsep kawp n shapraw
Waimaw Kanpaiti lam kaba langu htaw mawdaw ni hpe, Miwa maga de ding yang matut hpaw da ya ai lam chye lu ai.
Kanpaiti mare kaba hpe KIA dap maga November 20 ya shani htim gasat zing madu kau ai hpang, Miwa maga na pru shang lam hpe n htoi 2 pat kau ya lai wa sai re.
Miwa maga de pat kau ai rai tim, Miwa Langu mawdaw ni hpe matut htaw shalai bang la na matu langu sun madu ni kaw na bai garum hpyi wa ai majaw, Miwa maga na bai hpaw ya wa ai re lam chye lu ai.
Kanpaiti mare hpe KIO uphkang Sai ru jahkrat nga ai ten, Miwa maga de na gunrai tsep kaw n shapraw ya ai hte, langu si bang ai maisau sadek ni hpe du hkra n shalai ya mat ai majaw, Langu lauban ni yak hkak hkrum wa ai majaw, Miwa asuya hpe kalang bai garum hpyi ai majaw, dai ni kaw na Miwa maga de shang da ai Mawdaw yawng hpe bai hpaw ya taw sai nga, Langu htaw ginlen ai lam hpe garum ya taw ai hpaga num langai KNG de tsun dan wa ai re.
“langu mawdaw ni ding yang na gaw hkawm taw nga ai, pru shang galaw taw ai, ya hte Kanpaiti majan byin wa ai hpang Miwa mag ana 2 ya gan pat kau ya ai, ya bai hpaw sai, ndai laman gaw Miwa de na hpa rai mung n shapraw ai ga rai nga ai, langu bang ai Maisau sadek hpe du hkra n shapraw ya mat ai. dai ni kaw na gaw yawng bai hpaw ya taw sai,” nga tsun dan wa ai re.
Ya ten Miwa mung de langu mawdaw ni ding yang pru shang ai lam ni nga taw ai rai tim, Miwa maga na gaw, gunrai tsep kawp n htaw shapraw shangun ai re.
Ya na zawn Miwa maga de na gunrai tsep kawp n shapraw shangun ai lam hte seng nna, KIO maga de na mung matut la yu taw ai masa rai nna, Ndai laman, masha lang gunrai ram hpe sha pyi n shalai bang shangun ai rai yang, KIO maga de na Langu mawdaw ni hpe mung bai pat kau ya na nga na tsun ai lam, Langu sun bungli madu langai KNG de tsun dan ga wa ai re.
KIA dap maga Pang Wa mare hpe htim gasat zing kau ai hpang, Miwa maga de na ya na zawn jarit chyinghka yawng pat kau ya ai hpang, gunrai ni hpe mung tsep kawp n htaw shalai shangun mat ai rai nga ai.
